Joshua leh Wilder intawng hnai?

Anthony Joshua promoter Eddie Hearn chuan a boxer chu Deontay Wilder nena inhnek turin inremna an nei hnai tawh niin a sawi a, "Inbiakna thui tak kalpui a ni tawh," a ti.

WBA, WBO leh IBF world champion Joshua hian June 1 khian a vawi khat nan US-ah inhnek a hmachhawn dawn a, Madison Square Garden-ah Jarrell Miller nen an intawng dawn.

Hetihlai hian Tyson Fury nen an inrem theih lawk loh avangin WBC chuan an heavyweight champion Joshua hi Dominic Breazeale hmachhawn turin an ti a, hei vang hian Joshua leh Wilder hi inhnek dawn pawh ni se kum tawp lam tal chu an nghah a ngai dawn tihna a ni.

Hearn chuan, "Thil zawng zawng sawi a la rem lo a, ka la sawi vek thei lo. Boxer pahnih hian an hmaa ding tur an la nei ve ve rih a, chu pawh an chinfel phawt a la ngai. Tih tur tam tak a la awm a, chutihrual chuan November emaw December-ah chuan an inhnek hman ka beisei," tiin a sawi.