2nd Division League-ah ATK hnehtu Chhinga Veng dinhmun ṭha

Chhinga Veng chuan Nilaini khan ATK Reserves chu Howrah Stadium-ah 2-1 in an hneh a, inkhel dangah New Barrackpore Rainbow leh Trau te 3-3 a an inhnehtawk avangin Mizo club hi final round lut turin an dinhmun a ṭha ta hle.

2nd Division I League-ah hian Chhinga Veng awmnaah hian team paruk an awm a, group C aṭangin team pahnihin final round an lut dawn. Group dang pahnihah erawh team nga ve ve awmin final round-ah team khat ve ve an lut ang.

Chhingcows an tho
Chhinga Vengin inhliam MS Dawngliana leh PC Laldinpuia tel loin Mohammedan SC an hmachhawn a, 3-0 in an chak lo. Amaherawhchu ATK Reserves an hmachhawn ṭumin defender Dinpuia a dam tawh a, Dawngtea awm lo mah se ISL club Reserves team hneh turin an ṭha tawk.

Coach Lalsangzual Hmar-in Mohammedan an hmachhawn ṭuma an foreigner neihchhun Godwin Quashiga chu defensive midfield aṭanga defence laia a sawn luh chu a fuh lo tih a hria a, Ghanaian player hi a position ngaiah a dah let. Mizo club-in bul an ṭan ṭha a, Lalromawia hmangin minute riatna lekah an khung a, minute 14-naah penalty aṭangin Immanuel HS Lalṭhazuala'n a khung belh bawk.

Bawngkawn tlangval Zuala hi defender nichungin RG Stadium-a Rainbow an hneh ṭumin hattrick a siam a, hemi ṭuma goal hnih hi penalty aṭanga a khung a ni. ATK Reserves hian penalty aṭang bawkin minute 22-naah Yumnam Gopi Singh hmangin sut ṭhen mah se goal dang a luh belh lo.

Chhinga Veng hmabak
Chhinga Veng hian March 18 hian RG Stadium-ah Jamshedpur FC Reserves an mikhual dawn a, point an hlawh chhuak hrim hrim a nih chuan final round ticket an nei ang.

Mizo club hian an match hnuhnung ber hi Trau FC nen Mualpuiah tho March 22 hian an khel dawn. Chhingcows hian match hnuhnung pahnihah hian point hlawh chhuak lo pawh ni se inkhel dang result a zirin final round an lut thei bawk.