Arsenal hmabak a hautak dawn

Zanin hian Europa League last 16 second leg khelh a ni dawn a, Arsenal tan zanin dar 1:30-a Rennes an mikhual hunah hna a hautak tawh dawn hle. Quarterfinal lut tur chuan an mikhual lakah 2-0 chin tala hnehna an chan a ngai tawh dawn. Premier League club lian pakhat zawk Chelsea erawh 3-0 a hmahruai lai an nih avangin tlang chiang tura ngaih an ni.

March 7 khan Arsenal hi khualmualah feh chhuakin 3-1 in an tlawm haw, an defender Sokratis Papastathopoulos hnawh­­chhuah a nih bakah Nacho Monreal-a'n an mahni lamah a ti lut bawk - chhuanlam an nei, zaninah erawh chhuan­lam siam­in awmzia a awm tawh dawn lo.

Beiseina
Europa League last 32-ah khan Bate Borisov khelmualah tlawm mah se Emirates Stadium-ah an tho chhuak thei a, Rennes an hneh loh hnua manager Unai Emery inhnemna pawh 'kan khelmualah kan ka inkhel ve dawn' tih a ni.

Arsenal beiseina siam thar turin an match hmasa zawka an chhawr theih loh Alexandre Lacazette an chhawr thei dawn. French striker hi Bate Borisov laka a red card hmuh vangin match thum atan hrem a ni a, mahse club lamin an khinlet hnuah hremna hi match khat atan an tih nep sak.

Lyon striker hlui hi an match hnuhnung bera Manchester United an hneh ṭumin a khel ṭha hle a, United lakah goal khung lo mah se tlarhnung chhaih buaitu a nih bakah penalty a hlawh chhuak bawk - Pierre-Emerick Aubameyang nen an inkawp hi Rennes tlarhnung tan mut ti tui lo tham an ni ang.

UCL ticket?
Premier League table-a pa­lina ni lai Arsenal hian season hnih chhung Champions League an khel phak lo tawh a, manager thar Emery hnuaia an thil tum lian ber pakhat chu European football inelna sang bera inlan a ni.

League match bika an khelh hmabak en mai chuan Gunners hian a sang pali china awm theihna hun ṭha an nei. Mahse, season tawp lamah chuan club te lakah pawh chetsual theih vek a ni. UCL ticket neih theihna kawng pakhat chu Europa League nomawi chawi a ni dawn.

Arsenal hi United an hneh vanga an phur vanglai a ni a, an khelmual Emirates Stadium an hmanthiam bawk avangin inrintawkna an nei bawk ang. Kar tawp match khelh tur an neih loh avangin Emery-a'n player khek bik nei loin a duh a thlang thei ang.

90% chu...
Europa League khelh a nih tawh chinah team 81 zinga 73 chuan first leg-a 3-0 a hma an hruai tawh chuan round sang zawk an lut thei, tun hma lam thil thlir let chuan Chelsea tan quarterfinal luhna kawng chu 90% zetin a inhawng zau tihna a ni.

Kum 2015 October thla khan Dynamo Kiev hian an khelmual NSC Olimpiyskiy-ah Chelsea hi an lo mikhual tawh a, Champions League group stage inkhelah goal awm loin an inhnehtawk - tun ṭumah erawh Ukrainian club tan tlang tur chuan goal thum aia tam khung ngei ngei a ngai tawh dawn.

Maurizio Sarri naute hian Europa League lamah result nei ṭha viau mah se league lamah beisei an phak lo, kar tawp khan an mikhual Wolves chu 1-1 in an inhnehtawkpui hram. Pathianni zanah Everton an lenchilh zui dawn bawk avangin Sarri tan goal chhuah hnem loa tlang theihna tur tawk player remkhawm thiam a pawimawh ang.