World Cup 2022-ah team 48?

Zirtawpnia FIFA Council ṭhu tur chuan World Cup Qatar 2022-a team 48 tel tur chungchang an ngaihtuah dawn a, Council hian team 48 inel hi an remti a nih chuan June-a FIFA Congress ngaihven turin an thlen leh ang.

World Cup-ah hian team 48 an tel a nih chuan FIFA chuan pound maktaduai 303 vel zet chu hmuh belh an inbeisei a, team tel zat hi tihpun a nih chuan Qatar ṭhenawm ram Kuwait, Oman, Saudi Arabia leh United Arab Emirates zinga eng ram emaw ber hian match ṭhenkhat chu an thleng ve bawk dawn a ni.

Hetihlai hian Amnesty Inter­national chuan thawm lo nei vein World Cup thleng thei ram zingah human rights bawhchhiatna a tam niin an sawi a, FIFA chuan human rights policy an neih sa mila an kalpui vek tur thu an sawi.

Sum Hmuhna Tur
FIFA hian World Cup-ah team 48 an tel a nih chuan sum a pun tur thu an sawi a, an sum hmuhna tur hi eng nge ni ang, tih zawhna a awm thei.

• Team 48 aṭang chuan match khelh tur a pung dawn tihna a ni a, he inkhel ho pekchhuahna tur broadcasting rights

aṭangin pound maktaduai 92 hmuh belh beisei a ni.

• Tournament sponsors aṭangin pound maktaduai 120

• Tickets aṭangin pound mak­taduai 89.9

• Hospitality package aṭangin pound maktaduai 15

• Licensing agreement aṭangin pound maktaduai 7.5

Engtin?
Team 16 an tel thar dawn tihna a ni a, group 16-ah team pathum zel awma ṭhen hran an ni ang a, a sang pahnih zelin round of 32 an lut ang.

Team 48 tel tur hi Canada, Mexico leh United States of Ame­ri­ca-in 2026-a an inthlen ṭawm hun atan ruahman a ni a, Qatar-ah hian an hmang ṭan a nih chuan 'extra team' hi 2026 atana ruahmanna ang thoa kalpui rin a ni. Europe-in team 16 an nei tawh dawn a, tuna an neih zat hi 13 a ni. Africa 9 (5), Asia 8.5 (4.5), South America 5 (4.5), CONCACAF 6.5 (3.5), Oceania 1 (0.5), Host Nation (a thlengtu) 1 (1).

Bracket zel hi tuna khawmual­pui tinin team tel thei an neih zat zel a ni a, '.5' tih hi inter-fede­ration play-off hmanga tlin belh tur nei thei chhinchhiahna a ni.