Tualchhung boxing Pro Fight a hlawhtling
Yoda 4x4 LPS Pro Fight 2019 chu Thawhlehni zan khan a hmawr bawkna neih a ni a, inhnek hmuhnawm panga awm zan hian Mizo mipuite thinlungah tualchhung boxing chuan thuk takin hmun a luah tih a lang.
R. Dengṭhuama Indoor Stadium, Mualpuiah champion lai NT Lalbiakkima, Lalrinawma (Ago-a) leh HC Johnkenty Vanhlimpuia ten an kawnghren neih lai an venghim thei a, Laldingliana leh C. Lalduhawma te chu champion thar an ni.
Record thar
Vanglaini pali zawhna chhangin NT Lalbiakkima chuan, "Champion leh ngei ka tum," tiin title fight an neih hmain a sawi a, New Siaha boxer hian a tum a tihlawhtling. A vawi nga nana lightfly champion ni turin F. Zoramchhana chu unanimous decision (49-46, 50-45, 48-47) in a hneh.
Pro Fight weight khatah a zawna vawi nga champion thei hmasa ber Biakkima hian a tir aṭanga a tawp thlengin inhnek a thunun a, inelna hnuhnung bera a hneh tawh Cherhlun rawlthar Zotea tan dinhmun sawhngheh theihna hun a siamsak lo. GIG Motors Fighter of the Night atan thlan a ni.
Olympic gold medallist Hasanboy Dusmatov pawh hneh tawhtu Biakkima hian 2014 khan Pro Fight a khel ṭan a, champion lai Laldinmawia kut aṭanga kawnghren chhuhsakin tualchhung boxing inelna ngaihhlutah hian match a khelh zawng zawngah hnehna a la chang vek.
Champion thar
Bantam weight huangah champion lai Zonuntluanga'n (Tetea) amah chotu Laldingliana lakah a title a hum zo lo. Tuipui boxer hian a vawi khat champion-na ni turin unanimous decision (48-47, 49-46, 49-46) in hnehna a chang a, Tuipui tlangval zingah Laldinmawia (lightfly) leh HC Johnkenty Vanhlimpuia (middle leh lightheavy) te hnung zuiin champion thei pathumna a ni.
Dingliana hi a che rang a, a hnek thui bawk avangin Dinthar tlangval Tetea'n a chhutsual fo a. Tuipui tlangval Dingliana a inven thiam bawk avangin kum 30 mi Tetea title kawl lai a chhuh sak a, kumin bikah champion lai hneh awmchhun a ni.
Ago-a tho
Boxer ṭha tamna light weight-ah champion lai Lalrinawma (Ago-a) chuan Vanlalawmpuia chu split decision in an hneh a, mipui lamin judge thutlukna an ṭawmpui lo.
Judge pahnihin Ago-a hi 48-47 in an chaktir a, judge pakhat dangin Awmpuia hi 49-46 in an chaktir thung. Mipui an lungawi loh avangin inkhelh khaihlak hlek a ni a, result erawh a danglam phah lo.
Light weight-ah boxer ṭha Anthony Lalduhawma leh Lalmuanpuia te awm loh hnuah Ago-a hi a zawnin a champion ta a, Khuangthing tlangval Awmpuia erawhin a la nghah rei hret a ṭul dawn a ni.
Middle
Champion lai Zarzokima a inlan theih loh avangin C. Lalduhawma leh H. Lalrinhlua te tan title lak theihna hun ṭha a inhawng a, Ramhlun South boxer Duhawma'n a kut tum vei lam a hman thia zar zoin 50-45, 50-45, 49-46 in hnehna a chang.
Ramhlun Sporting Club boxer hian inhnek tawp dawn lamah a khingpui Hnahthial tlangval hi nalh zetin hnuai lam aṭangin a dâwm fuh a, tharum ngah leh ṭuan rang tak ni lo mah se a dinhmun rahpelh lai nei loa a khelh tluan theih avangin a chak.
Second 53
HC Johnkenty Vanhlimpuia'n tualchhung boxer ṭha chungchuang a nih zia lantir nan second 53 chhung bak a mamawh lo. Tuipui tlangval hian a khingpui DK Munga chu round khatna an khel ṭan dawn chauh tihin a hnek tlu nghal a, a vawi nga nan Pro Fight title a la.
Johnkeny-a'n Pro Fight a khelh tawha a chak awlsam ber ṭuma ngaih a tawng a, inelnaah hian a beih apiang a hneh vek. Lightheavy huanga a inlan aṭangin mi paruk a tawnna a ni a, a khingpuite hi knockout vekin round thum khel tluan pui a la nei lo.
Kum 2014 khan middle-ah bul ṭanin champion lai Zarzoliana lakah technical knockout-in round thumnaah a chak a, Zotea inhliam vangin inhnek tihtawp a ngai. Pro Fight chanchina weight hrang pahniha champion thei awmchhun niin inhnek vawi 13 a hmachhawn tawhah a chak vek - Munga hi mi 10 a knockout-na chiah a ni.