Third round-ah Djokovic a tla

Tennis world number 1 Novak Djokovic chu BNP Paribas Open third round-ah Philipp Kohlschreiber hneh loin a tla a, player ṭha dang Roger Federer leh Rafael Nadal te erawhin an khingpui hnehin round sang zawk an inhlangkai.

Nimin zing Indian Wells-a inkhelah Djokovic hi world number 39 lakah 6-4, 6-4 in a tlawm a, an intawn hnuhnung pasariha a hneh vek German tlangval lakah a tir lama a chet fuh theih loh avangin a racquet vaw chhe hial mah se, set hnihnaah pawh a insiamṭha thei chuang lo.

Grand Slam khelh hnuhnung pali zinga nomawi pathum chawi thei Djokovic chuan, "Tun hma lama hlawhtlinna ka chan fo tawhna hmunah hetiang taka ka khel chhia hi chu ka lawm lo, khelh ṭhat duh mah ila a theih loh ni hi a awm ve a, chutiang ni zinga pakhat chu tun ṭum hi a ni.

"March 18 aṭanga khelh tur Miami Open chu singles inelna ka hmachhawn leh hmasak tur a ni dawn, tunah ka ṭhat dan berin awm lo mah ila hma ka sawn a, zawi muanga hma lam pan zelin Miami-ah chuan ka ṭhat dan ber ka thlen leh hman ka beisei," tiin a sawi.

Inkhel dangah Federer chuan a hnampui Stan Wawrinka chu 6-3, 6-4 a hnehin a tlang a, fourth round-ah chuan Kyle Edmund nen an intawng ang. Britain tlangval Edmund hian Radu Albot chu 6-3, 6-3 in a lo hneh ve bawk a ni.

Seeded pahnihna Rafael Nadal chuan Diego Schwartzman lakah 6-1, 6-4 in hnehna a chang a, Spanish player hian a khingpui hi break point hmuhtir miah loin hnehna a chang thei. Indian Wells vawi thum champion tawh Nadal hi seeded 15-na Daniil Medvedev hnehtu Filip Krajinovic nen an intum leh dawn.