Aizawl FC-in Super Cup khel dawn lo

Mizo club Aizawl FC chuan Hero Super Cup 2019 khelh an tum lo a, inelna neihna hmun Bhubaneswar aṭangin vawiin leh March 18 hian an rawn haw ang.

I League club 11 zinga pasarih Aizawl FC, Chennai City FC, Quess East Bengal, Mohun Bagan, NEROCA FC, Gokulam Kerala FC leh Minerva Punjab FC te chuan AIFF hnena an thuthawn chhanna an hmuh loh avangin Super Cup khelh an tum lo a, India rama football thuneitu sang ber hian a hnuaia club te awm zel dan tur hi a tichiang thei lo.

Aizawl FC technical director Hmingthansanga chuan, "Khelh tumin Bhubaneswar kan pan a, chhanna kan hmuh si loh avangin thil a danglam thut a nih loh chuan keini bik chu a chiang tawhah ka ngai. March 18-ah hian ticket kan la lawk tawh a, heta ticket nei lo hian March 15-ah haw kan tum," tiin nimin tlai khan Vanglaini a hrilh.

Ruahmanna hmasaah chuan vawiin aṭang hian Super Cup qualifying round khelh ṭan tur a ni a, amaherawhchu nimin khan press conference neih a ni lo a. He thuziah lai thlenga AIFF-in thuchhuah a la neih loh avangin vawiinah chuan an ṭan theih a rinawm tawh lo.