Liverpool hmaah German ral a lian zo lo

Bayern Munich khelmualah Liverpool an ropui a, a zawna season ruk chhung German champion ni thei hi 3-1 a hnehin Champions League aṭangin an hnawtchhuak.

Nilaini zan khan Champions League last 16 second leg-ah Liverpool-in Bayern Munich an lenchilh a, Allianz Arena-ah hnehna chang turin harsatna an tawk lo - 3-1 a an chaknaa goal lut hi anmahni khung vek a ni!

Sadio Mane chuan goal hnih a khung a, Virgil van Dijk chuan goal khat a thawh bawk. Bayern goal khung hi Reds defender Joel Matip-a'n an lama a tih luh a ni a, goal khung thiam bik Robert Lewandowski-a'n goal sawi tur a nei lo.

Bayern coach Niko Kovac-a'n Anfield-a an inkhelh zawh hnu lawka, "Dinhmun ṭha zawk ka sawi thiam lo," tia a sawi chu a hriatthiam turin a chhanna pek a ni ta a, Europe-a club thiam bik a sang pariat zingah an tel ve ta lo.

Class = Mane
Allianz Arena-ah Liverpool-in goal khung turin hun an duh rei lo - minute 26-na lekah Sadio Mane chuan a 'class' a pholang a, goalkeeper Manuel Neuer chetsualna chu a thiamzia pholan nan a hmang.

Mane hian Virgil van Dijk hnen aṭanga a ball hmuh chu goal aṭanga rawn tlan chhuak Neuer mawi zeta bum nan a hman hnuah a pet goal a, Bayern phur a rit sawt - chak turin goal hnih an mamawh. Liverpool boss Jurgen Klopp chuan, "Mane goal khung kha a ropui takzet a, vawi 500 vel zet chu ka en let a ngai hial a ni," tiin Mane goal khung chu player ṭha bik lo tan chuan tih harsa a nih thu a sawi.

Reds defender Joel Matip chuan minute 39-naah Serge Gnabry-a'n Robert Lewandowski tana a siamsak dan a tumna lamah an lamah a ti lut palh a, Allianz Arena-a Bayern fan-ten beiseina an nei thar.

Mahse maw...
Bayern tana inkhel bul ṭan zingah player paruk ngawt chu kum 30 chunglam vek an ni a, German club hi an tha a za tawk lo - si phurh an sut hnuah tlarhma an hriam lo a, Reds tlarhnungin hna an nei lo.

Minute 69-naah Liverpool bawkin goal an khung leh ta nge nge a, Rafinha leh Mats Hummels ven karah Van Dijk chuan James Milner corner aṭanga ball kal chu a tauh lut a, Liverpool an tlangah a ngaih theih. Hun tawp nan minute ruk chiah a awm tawh a, Bayern-in tlang tura an la mamawh zat chu goal hnih a ni - mahse dinhmun ṭha zawk Liverpool bawkin goal an khung a, goal khungtu pawh Sadio Mane bawk a ni.

Tun hnaia Reds tana goal khung harsat Mohamed Salah chuan penalty area-a awm Mane tan ṭha zetin ball a vawrh lut a, Senegalese forward tan goal-a chantir loh chi a ni lo - Liverpool-in 3-1 in hnehna an chang.

Hei le Liverpool
Champions League group stage takngial pawh an khelh phak loh fo hnuah Jurgen Klopp hoin Liverpool-in hmana an ropuina kha an nei let leh mek a, German coach chuan European club ṭha zingah an tel leh tak thu a sawi.

Jurgen Klopp chuan, "Zaninah hian mi zawng zawng hriat turin European football-a a sang ber pawl kan ni tih kan nem nghet a ni," a ti a, Bayern an hneh miau avangin hnial a harsa. Klopp chuan inkhel thlirletin, "Champions League-a kan away game-ah ṭum dang angin kan tlarhnung a phui tawk lo fo a, zaninah erawh kan insiamṭha ta.

"Kan hmaa ding chu tu pawh ni rawh se hmachhawn turin kan inpeih a ni. Ka naute hian he inelna hi a nuam an ti a, an hun neih hi hlim takin an hmang a ni," a ti a, quarterfinal-ah eng team pawh hmachhawn turin a inpeih.

A êng zawngin...}
Champions League last 16 aṭangin petchhuah an ni a, Bayern coach Niko Kovac dinhmun a derthawng tura ngaih a nih laiin a êng zawngin thil a thlir a, a hnual duh lo.

Croatian manager chuan, "Bundesliga leh German Cup-ah champion thei kan la ni a, engkim tawpna a la ni lo. He nomawi pahnih kan neihte hi chawi kan tum ang," tiin tualchhung football lamah an rilru an pek nghal tur thu an sawi. Bayern striker Robert Lewandowski a lungawi thei lo. Tun season Champions League-a goal riat khung tawhtu striker hian Liverpool a hmachhawn vawi hnihah goal a khung lo ve ve.

Polish striker chuan, "Game harsa tak a ni dawn tih kan hre sa a, mahse kan inkhelh pahnihah tlarhnung lam kan vengthawng mah mah a ni. Risk kan la ngam lo a, nawr ve kan tum pawhin player paliin player pahnihte kan hmachhawn a, a harsa a ni," tiin a sawi.