Final-ah Aizawl leh Lunglei

14th Sub Junior Inter District Football Championship final chu vawiin tlai dar 1:00 hian Serchhip-ah khelh a ni dawn a, Aizawl leh Lunglei an inhmachhawn ang.

Lunglei hian final lut turin group A hmahruaitu Siaha chu 3-1 in an hneh a, minute thumna leka K. Lalramchhana goal chu an dinhmun siamṭhatu a ni. Lunglei tan hian R. Lalrinchhana leh PC Rosangzuala ten an khung belh a, hemi karah hian Siaha tan HC Willis Byhna chuan goal khat a khung ve bawk.

Aizawl chiahin tun inelnaah an khingpui an la hneh vek a, Kolasib pawh awlsam takin an hneh. Aizawl tan Lalrinchhana'n goal hnih khungin Hmingchungnunga leh C. Lalrintluanga ten goal khat ve ve an khung belh a, Kolasib-in goal li an chhuah hnuah Remruatkima hmangin an khung.

Final-a inhmachhawn tur Lunglei leh Aizawl te hi group stage-ah an inhmachhawn tawh a, hemi ṭum hian Aizawl hi 5-1 in ngawtin an chak. Lunglei hi insiamṭhatin an match hmasa bera an mualpho hnuah match thum a zawnin an chak a, inelna thlengtu Serchhip pet tlatu an ni a, Aizawl hi awlsam takin nomawi laktir an tum lo ang.