Fulham mualah champion tum Liverpool

Pathianni zan dar 7:45-ah team pahnih tum 'inthlau' tak an inhmachhawn dawn a, table aṭanga tehin an dinhmun inthlau viau mah se an tum hlen tura chak ngei mamawh ve ve an ni a, inkhel a hmuhnawm dawn.

Liverpool hian Premier League table-ah pahnihna dinhmun an luah a, hmahruaitu Manchester City an phak lohna chu point khat chiah a ni - zaninah hnehna an chan chuan match khata khel tam chungin City an tlanpel ang.

Fulham erawh table-ah 19-na an ni mek a, a him china awm Burnley an phak lohna chu point 13 a ni a, Pathianni zanah an tlawm leh a nih ngat chuan an tan 'him' beisei chhunzawm a harsa dawn.

Thil thleng thei zawng zawng ngaihtuahin team pahnih hian thih thain an bei ang tih a chiang a, Pathianni zan Premier League inkhel tur hian chil a ti put lo thei lo.

Bayern ngamtu
Liverpool hi Champions League last 16 aṭanga 3-1 ngawta Bayern Munich ngamtu an ni a, quarterfinal-ah FC Porto an tum dawn tih a chian tawh bawk avangin an phur vanglai tak a ni ang tih a chiang.

Klopp chuan, "Kan season hman mekah rilru zawng zawng kan pe a, Bayern kan hneh avangin player te pawh an hlim hle. Hnehna kan chan avang khan mak ka ti lo a, kan duhdan takin kan khel zawk. Tunah chuan Fulham chiahin kan rilru an luah leh tawh," a ti.

Fulham hi tun season-ah an talbuai takzet. November khan Premier League thlenpuitu Slavisa Jokanovic an ban a, Claudio Ranieri an lalut. Mahse, Ranieri pawh hi February 28 khan an ban leh a, Scott Parker chu manager lailawk atan ruat a ni.

Mahse, Parker hnuaiah pawh Fulham-in eng ruai an ang lo. Chelsea leh Leicester City hmachhawn tawhin a tlawm ve ve a, Liverpool lakah an tan hnehna chan a harsa ang.

Mipui tan
Jurgen Klopp-a'n Liverpool a enkawl hnuah hna ropui tak a thawk a, Champions League pawh khel ngai mang tawh lo team hi Europe-a club hlauhawm pawlah a chhuah a, nomawi sawi tur la nei lo mah se a hming a chher hle.

Mahse, Klopp chuan a hnathawh engkim chu ama tan a nih loh thu a sawi. German coach chuan, "History-ah hriatreng ka ni ang, tih ang zawng hian ngaihtuahna ka seng ngai lo. Dortmund-ah ka chanchin an sawi ṭhin a, mahse chu chu ka beisei a ni lo.

"He team hian hlawhtlinna a chhar theihna apiangah hlawhtlinna a chhar ka duhsak a, kum 50 hnuah miin ka chanchin la sawi se, tih ang zawngin ngaihtuahna ka seng ngai lo. "Player leh fan-te duhna hi ka zah sak a, he beiseinaa an zinga ka tel thei hi ka lawm. Mahse, a tawpah chuan keima tan niloin fan-te tan vek a ni," tiin a sawi.

Inlan lo tur
Liverpool-in Bayern an hmachhawn ṭumin hliam vangin reilo teah Jordan Henderson lakchhuah a ngai a, Naby Keita chuan hliam vangin German club hi a hmachhawn lo bawk.

Klopp chuan, "Hendo dinhmun a la chiang lo a, Fulham erawh a hmachhawn thei lo ang. English midfielder hian a ke rekah hliam a tuar a, international break-ah a dam hman ka beisei," a ti. Naby Keita bik hi nizan khan Klopp chuan a dinhmun an zirchian leh tur thu a sawi a, he thu buatsaih a nih lai hian engmah a la chiang hman lo.

Alex Oxlade-Chamberlain chu international break zawh hunah 100%-in a fit hman dawn chauh a, Fulham a la hmachhawn thei dawn lo - international break hi karlehah neih a ni ang.