Bangladesh team-in thihna an pumpelh

Bangladesh cricket team chuan nimin khan Al Noor mosque tlawh an tum a, an luh hmain helai hmun hi misual silai kengin rawn kap chiamin mi engmaw zat an thi. Team manager Khaled Mashud Pilot chuan minute li lek pawhin thleng hma se chuan mosque chhungah an awm ngei tur thu a sawi.

Khaled Mashud Pilot chuan, "Bus chhungah khan mi 16-17 vel kan chhuang a, thil thlen dan kha kan hmu deuh vek ang. A rapthlak takzet a ni," tiin a sawi. Mosque hi an inkhelhna tur hmun Hagley Oval, Christchurch bula awm a ni.

New Zealand prime minister Jacinda Ardern chuan mosque dang pawhin beih an tawh thu a sawi a, he thu ziah lai hian mosque pahnih beihna vang hian mi 49 an thi a, na takin mi 40 chuang an hliam bawk.

Nimina thil thleng avangin hian Bangladesh leh New Zealand ten vawiin aṭanga test match vawi thumna an khelh tur chu an ṭhulh thu an puang nghal. Bangladesh wicketkeeper batsman Mushfiqur Rahim chuan, "Kan vannei takzet a, hmuh nawn leh ka duh tawh lo," tiin thil thleng chungchang a sawi.

Bangladesh Cricket Board chuan an team chu him takin hotel-ah an thleng tih an sawi a, an rilru lamah erawh nghawng a nei lian hle. New Zealand Cricket chief executive David White chuan, "Bangladesh nen kan inbia a, hetiang boruakah chuan kan inkhelh a rem rih lo tih hi kan thutlukna chu a ni. Team pahnihah nghawng lian tak a nei a, kan ram a nih angin kan mikhual te himna hi kan ngaihtuah a ṭul a ni," tiin thleng nawn tawh lo se a tih thu a sawi.