ISL champion a hriat dawn ta

Pathianni zan dar 7:30-ah Indian Super League final khelh a ni dawn ta a, Bengaluru FC leh FC Goa ten Mumbai khawpuia Indian champion nih an inchuh ang.

Mumbai Football Arena-a intawng tur team pahnih hi final luh phu ber team ang pawhin chhal theih an ni a, league round-ah khan Bengaluru hi table chung berah an awm a, an hnuai chiahah FC Goa an awm.

Intluk tawk
League round-ah khan team pahnih hian point 34 ve ve an nei a, Bengaluru-in table chung bera season an khar chhan chu head-to-head a an ṭhat zawk vang chauh a ni - mahse hei hi Goa tan insiamṭhatna tur a ni ang.

FC Goa hi tun season-a Bengaluru vawi hnih an hma-chhawnah an tlawm ve ve a, goal nga an chhuah laiin Bengaluru lamah goal khat chiah an khung thung - zaninah an tlawm leh chuan nomawi an thlir liam a ṭul dawn.

En bik tur
Bengaluru tan season dang ang bawkin Sunil Chhetri chu en bik tur a ni dawn a, tun season-a goal kua khung tawh striker thlawp turin Miku leh Udanta Singh an la awm cheu bawk a, Goa tlarhnung tan hna a tam dawn.

Goal khungah kher chuan FC Goa lamin harsatna an nei lo a, tlarhmaa goal 16 khung tawh Ferran Corominas an nei hi an innghahna tur a ni.

Duhthusam chu
FC Goa coach Sergio Lobera-a'n a duhthusam tak final-a a hmachhawn tur thu a sawi. Spanish manager chuan, "Ka hmaa chona inchhawp hachhawn nuamti mi ka ni a, Bengaluru hi vawi hnih kan hmachhawnah khan kan tlawm avangin final-a tawn nawn leh ngat ka duh a ni," a ti a, phuba lak a duh.

Barcelona assistant coach hlui hian FC Goa hi season hmasa khan a enkawl ṭan a, semifinal khelhpui mah se Chennaiyin FC lakah tlawmin final an lut zo lo.

Beiseina nen
Bengaluru hian final lut turin semifinal first leg-ah NorthEast United chu 1-2 in ngam lo mah se 3-0 in an hneh let leh a, final an lut. Bangalore club coach Carles Cuadrat chuan, "Kan hnehna chan dan khan phurna min pek belh a, tun aia ṭha zawka final khel turin kan inpuahchah a ni," a ti.

South Indian club Bengaluru hi 2013-ah indin chauh mah se Indian club hlawhtling ber pawl an ni der tawh. I League nomawi vawi hnih ngawt an chawi hnuah nikum khan Indian Super League-ah an insawn a, a zawnin final an lut leh der tawh.