Semifinal-ah Raonic leh Thiem

BNP Paribas Open-ah Milos Raonic leh Dominic Thiem ten semifinal an inhlangkai a, hmeichhe singles lamah Angelique Kerber chuan Venus Williams hnehin quarterfinal a paltlang ve bawk.

Inelna hi California-a neih a ni a, Ningani inkhelah seeded 13-na Raonic hian Miomir Kecmanovic chu 6-3, 6-4 in a hneh a, hnehna chang tur hian aces vawi 13 vaw chhuakin 2015 hnu lama ATP 1,000 Masters-ah a vawi li nan semifinal a lut.

Kum 2016 finalist Raonic hian a match lehpekah chuan Thiem a hmachhawn dawn, Austrian tlangval Thiem hi Gael Monfils nena inkhel tur an ni a, mahse Monfils hi a ke artui hliam vangin a inlan thei lo. French tlangval Monfils chuan, "Inkhelh luih ka tum a, mahse 100% a damloh hi chuan tih hram hi a harsa ṭhin. Inkhel en tum mipui chungah ngaihdam ka dil a, season tharah tun aia ṭha zawkin inlan leh ngei ka tum ang," tiin a sawi.

Hmeichhe singles champion ni thei tura ngaih pahnih inkhelah Kerber chuan Venus chu darkar khat leh minute 36 chhungin 7-6 (3), 6-3 in a hneh a, semifinal-ah Belinda Bencic nen an inhmachhawn ang.

Inkhel dangah Bencic-i'n tun hnaia a khelh ṭhat a chhawmnung ve zel a, Swiss nula hian Karolina Pliskova chu 6-3, 4-6, 6-3 in a hneh. Seeded 23-na hian unforced errors vawi ruk nei mah se winners ṭum 14 vaw chhuakin harsa lutuk loin hnehna a chang a ni.