Auba awmna Arsenal tho chhuak
Pierre-Emerick Aubameyang-a'n goal hnih a khung bakah Ainsley Maitland-Niles goal khung tur siamsakin Arsenal chu Rennes lakah 3-0 in hnehna a chanpui a, Europa League last 16 inkhel pahnih belhkhawmah Gunners hian 4-3 a hnehna changin quarterfinal an lut.
Ningani zan inkhel dangah Chelsea chuan 3-0 a an hneh tawh Dynamo Kiev chu Olivier Giroud-a hattrick hmangin 5-0 in an sawp nawn a, Maurizio Sarri naute hian aggregate-ah 8-0 a hnehna changin last 16 an paltlang chiang hle.
Laipui a puak
Roazhon Park-a an inkhelh ṭumin Arsenal defender Sokratis Papastathopoulos hnawhchhuah a nih bakah Nacho Monreal-a'n anmahni lamah a ti lut a, 3-1 in an tlawm haw. Unai Emery inhnemna chu, "Kan khelmualah kan la inkhel dawn," tih a ni.
Emirates Stadium-ah Unai Emery-a'n a sa huai - Aubameyang, Alexandre Lacazette, Aaron Ramsey leh Mesut Ozil te chu inkhel bul a ṭantir vek a, minute ngana lekah Ramsey-a'n Auba goal khung tur siamsak nghalin beiseina a nung zual.
French Ligue 1 club Rennes an insiamrem hleithei lo. Wales international Ramsey ball pek chu Aubameyang-a'n line a pelh hma chiaha cross in vengtu nei lo Maitland-Niles chuan minute 15-naah a tauh lut. Gabonese striker Auba hian second half-ah defender Sead Kolasinac-a cross chu hnai tak aṭangin a pet lut bawk.
Nomawi?
Sevilla a enkawl laia a zawna Europa League nomawi vawi thum chawi thei Emery chuan, "Europa League title hi kan chawi thei a ni tih kan hria," tiin Arsenal a enkawl season hmasa berah nomawi hlawhchhuah nghal a tum.
Spanish manager chuan sawi zawmin, "3-0 a hnehna chan hi a ṭha tawk hle, minute 90 chhung ṭha takin kan khel a, kha aia ṭha pawh khan kan la khel thei. Chawlhkar ṭha tak kan hman avangin hlim tur kan ni," a ti. International break a awm zui dawn avangin Arsenal hian Dubai-ah training an nei dawn.
Gunners hian Premier League-a an match hnuhnung berah an mikhual Manchester United 2-0 in an hneh bawk a, an boruak ṭhat lai a ni. Tunkar tawpah erawh match an nei dawn lo, FA Cup-ah an tla tawh a, Wolves nen league match an khelh tur sawn sak an ni bawk - April 2 zanah Newcastle an mikhual leh chauh dawn a ni.
Hei le Giroud
Maurizio Sarri-a'n striker a neih pahnih Gonzalo Higuain leh Olivier Giroud te a hman dan a inang lo a, Juventus aṭanga a hawh Higuan hi Premier League-ah a hman laiin, Arsenal striker hlui hi Europa League-ah a hmang ṭhin thung.
France international Giroud-a'n tun season chhunga Blues tan European football bika a goal kuana ni turin Kiev lakah goal thum a khung a, Didier Drogba (May 2010) hnuah Chelsea tana hattrick siam leh thei hmasa ber a ni - ani bakah hian Marcos Alonso leh Callum Hudson-Odoi ten goal khat ve ve an khung bawk.
London club tan 5-0 a hnehna chan hi Europa League bikah chuan khualmuala an chak chian ber ṭum a ni a, Italian manager Sarri tan nomawi hmasa ber beiseina a sang zual ang. Blues hian Pathianni zan dar 10:00 hian league match khel turin Everton an lenchilh nghal dawn a ni.
Arsenal hmabak hautak
Nimin tlai khan Europa League quarterfinal inkhel tur leh semifinal khelh chhoh dan tur pawh nghal a ni a, Arsenal leh Napoli an intum dawn. Chelsea chuan Slavia Prague an hmachhawn thung ang. Premier League club pahnih hi final hma chuan an inhmachhawn dawn lo.
Unai Emery enkawl Gunners hmachhawn tur Napoli hi Champions League aṭanga tla an ni. UCL group stage-ah Paris Saint-Germain leh Liverpool te an tluk lo, an khingpui tur Arsenal hi Premier League-a pangana nih vanga Europa League khel nghal an ni thung. Quarterfinal hi April 11 leh 18-ah khelh tur niin, semifinal hi May 2 leh 9-ah khelh tur a ni thung. Final chu May 29 hian Olympic Stadium, Baku-ah an khel ang.
Quarterfinal
Napoli vs Arsenal
Villareal vs Valencia
Benfica vs Eintracht Frankfurt
Slavia Prague v Chelsea
Semifinal
Napoli/Arsenal vs Villareal/Valencia
Benfica/Eintracht Frankfurt vs Slavia Prague/Chelsea