RG Stadium-ah inkhel pawimawh Zanin dar 7:00-ah Aizawl FC Vs Churchill Brothers

Aizawl FC-in I League khelh mekah point sarih an hlawh chhuak tawh a, zanin dar 7:00 hian RG Stadium, Mualpuiah anmahni aia point hniha hmu tam Churchill Brothers an hmachhawn dawn.

Mizo club tan tun hi dinhmun siam ṭhatna hun ṭha a ni a, hnehna an chang an nih chuan hmahruaitu Mohun Bagan nen an point hmuh zat a inang thei ang.

Kulhpui nghet Aizawl FC-in Khalid Jamil hnuaia kum 2017-a I League an champion khan an mual RG Stadium an hmang thiam a, nomawi an chawi chhan bulpui a tih theih. Mizo club champion ṭum khan I League-ah team 10 awmin RG Stadium-ah match kua khelh a ni a, Aizawl FC hian vawi riat hnehna changin vawi khat chiah an inhnehtawk. 

Mizo club point hlohna awm chhun pawh hi khatih hunlaia champion lai Bengaluru an ni a, Ashley Westwood kaihhruai team-ah India captain Sunil Chhetri, C.K. Vineeth, Eugeneson Lyngdoh leh Udanta Singh bakah foreinger ṭha John Johnson leh Curtis Osano te an awm nuk. Aizawl FC hian Kolkata club lian Mohun Bagan leh East Bengal bakah club dang Shillong Lajong, Churchill Brothers, DSK Shivajians, Chennai City FC, Punjab FC leh Mumbai FC te chu an hneh vek.

Tun season I League-ah Aizawl FC-in an mualah hneh loh la tawng lo mah se chak an la nei lo. Vawi thum an khelh tawhah an inhnehtawk vek. Mizo club-in foreigner pahnih chauh an neih laia India ram club hlun Mohun Bagan nen goal awm loa an inhnehtawk kha result ṭha a nih rualin, match hnuhnung pahnihah Chennai City (1-1) leh Punjab FC (3-3) an inhnehtawkpui chhunzawm erawh point thum hmuh theihna tur a nih avangin a pawi hle.

MPL champion hian I League-a an champion ṭuma RG Stadium-a match kua an khelh khan goal thum chiah an chhuah a, match khatah goal khat aia tam chhuah nei loin vawi ruk an cleansheet. Tun season-ah erawh match thum khelhah goal li an chhuah tawh a, RG Stadium hi Mizo club tan kulhpui nghet a nih theih nan Mizo club-in tlarhnung aṭanga inthuam ṭhat an mamawh.

Aizawl FC hian coach Standly Rosario hnuaiah awmze neiin tlarhnung an rem a, Mizoram Premier League-a tlarhnung khawng ṭha ber an ni. Defence laiah Juuko Richard Kassaga leh C. Lalrosanga-te inkawpin mual sirah Joe Zoherliana leh Lalramhmunmawia te an awm. Standly hian MPL-a tlarhnung ṭhat dan ber hre tur hian I Day Football chu in enchhin nan a hmang a, MPL chanve an thlen meuh chuan an ṭhat dan ber a hre tawh.

I League-ah erawh foreigner pali vawi khatah an luh theih nghal avangin tlarhnung thuam ṭhat a ṭul leh a, defence thar din a ṭul. Mizo club-in Ghana U20 tan pawha khel tawh Joseph Adjei an lalut a, MPL best defender Kassaga nen an inkawp rem ṭan. Amaherawhchu Adjei hi an match hnuhnung bera Gokulam nen an inkhelh ṭumin hnawhchhuah a ni a, zanin hian a inlan theih loh bakah January 25-a Trau an tlawh hunah a inlan thei lo bawk ang.

AFC hian tlarhnung thuam chak nan Chhinga Veng aṭangin Lalthlahlova lalut mah se Standly hian MPL-a a hman thiam sa player palite bawk a hman a rinawm. Mizo club tan tun hma ang thoin Alfred Kemah Jaryan a ṭangkai a, midfielder Paul Ramfangzauva leh winger hmuhnawm pahnih Rochharzela leh Isak Vanlalruatfela ten hmasawn zel an mamawh. 

Aizawl FC foreign striker Abdoulaye Kanoute-a'n Goan club lama goal a khung avangin bul a ṭan nawn a rinawm a, midfielder Amadou Alou Sissoko erawhin bul a ṭan lo ang. 

Mizo club coach Standly Rosario chuan, "Foreigner pahnih emaw pakhat kan lak belh ang," tiin a sawi, foreigner paruk kawl phalna I League-ah panga an kawl sa - pahnih an lak belh dawn a nih chuan Sissoko hi a chhuah rinawm ber a ni.

Willis Plaza telna 

Churchill Brothers hian an match hnuhnung berah East Bengal an hneh a, hemi ṭuma goal awm chhun khungtu Willis Plaza hi chhinchhiah a ṭha.

Trinidad and Tobago international Plaza hi feet ruk leh inches hniha sang a ni a, ball a thiam bakah India ram a hriat chian tawh avangin a tawrhhlelh awm ang. Goan club-ah hian Mizo pathum Lalkhawpuimawia, Vanlalduatsanga leh Lalengzama Vangchhia te an awm a, Kelkang tlangval Mapuia hi bul ṭantu zinga mi a ni. Aizawl FC striker hlui Mapuia hian Dinthar FC tana a khelh laiin I League club lamah hian goal ropui a khung tawh ṭhin a, Mizo club tana mangchhia thlen thei tur zinga mi a ni.