Amir Khan-a'n chawlh a la tum lo
WBA leh IBF light-welterweight champion lo ni tawh Amir Khan chuan boxing a chawlhsan dawn nia sawi thawm awm mah se Pakistani thisen kai fighter hian ring hnuchhawn zawnga hun hman a la tum loh thu a sawi.
Kum 33 mi boxer chuan, "Tun laia hri leng mek coronavirus vangin tum lo deuh thil pawh sawi mai awlsam tak a ni. Keimahah buaina ka la nei lo a, ka la chak ṭha a, boxing mangṭha tumna ka la nei lo," a ti.
Amir Khan hi July 2019 hnuah a inlan leh tawh lo a, a inlan hnuhnung berah hian Australian boxer Billy Dib chu Saudi Arabia-ah a hneh a ni.
Khan hian vawi tam a lo cho tawh Manny Pacquiao hming a lam zui a, khawvela boxer ropui ber pawl hi hmachhawn ngei a duh.
Vawi 39 fight a hmachhawna vawi nga tlawm tawh boxer chuan, "Pacquiao hmachhawn ngei ka duh a, mahse coronavirus lockdown vang hian in la 'fit' leh turin boxer tenau zawk hmachhawn phawt pawh ka pawi ti lo ang," tiin a sawi.
Bolton tlangval chuan sawi zawmin, "Manny hmachhawn hi ka chak reng ṭhin chu a ni a, a thleng thei a nih chuan ka lawm khawp ang. Kan ti thei ta lo a nih pawhin duhthlan tur dang kan neihte kan en mai a ni ang chu," a ti.
Amir Khan leh Pacman hi boxer inhre ṭha tak an ni a, an theihna pawh an inhrechiang tawn hle ang - Los Angeles Wildcard Gym-a Freddie Roach hnuaiah training an nei dun ṭhin a, vawi tam training-naah hian an lo in fight tawh a ni.
British boxer hi a hmelma kumhlun Kell Brook hmachhawn tura sawi a awm bawk a, mahse Khan hian Brook erawh a hmachhawn a rinawm tawh lo.
Brook hi light-middleweight-ah a insawn chho a, Khan chuan Brook hmachhawn tur ringawta insawn chhoh a tum lo. Amir Khan chuan, "Brook hi ka hmachhawn duh lo angin an sawi a, mahse a ni lo.
"Weight rit zawkah a kai sang a, tihsual ka duh lo. Saul 'Canelo' Alvarez hmachhawn turin ka weight ti rit chawpin ka insawn chho a, ka tlawm a ni. Tihsual ka duh tawh lo," tiin a fimkhur thu a sawi.