Man City hnehtu Tuchel-a Chelsea

Manchester City nomawi pali beiseina chu Thomas Tuchel-a enkawl Chelsea-in an ti tawp. Inrinni zan khan FA Cup semifinal-ah Blues hian minute 55-naa Hakim Ziyech-a goal hmangin Pep Guardiola kaihhruai Man City hi 1-0 in an hneh.

FA Cup final hi May 15 hian Wembley Stadium-ah khelh a ni dawn a, London club hian nizana Leicester City leh Southampton inkhela chak zawk nen nomawi an inchuh ang.

Pa luhlul Pep
Pep Guardiola chuan FA Cup semifinal khelh hmain keeper Zack Steffen a rin tur thu a sawi a, Spanish manager hian, "Team hloh ai chuan chak loh ka thlang zawk," tiin thutlukna a siam. Pep-a hian thutlukna huaisen a siam a, chutihrualin Steffen hi United States number 1 keeper a ni a, rin ngam tur chu a ni bawk.

Barcelona manager hlui hian Borussia Dortmund an hneh ṭum aṭangin player pariat ngawt a thlak. Kevin de Bruyne, Ruben Dias leh Rodri te chiahin bul an ṭan nawn a, tlarhmaah Raheem Sterling, Gabriel Jesus leh Ferran Torres te an awm a, De Bruyne-a'n a thlawp.

Midfield-ah Rodri leh Fernandinho te an inkawp a, defence-ah Benjamin Mendy, Aymeric Laporte, Dias leh Joao Cancelo te an awm. Player thlir chuan Man City nem zawk tih a hriat lo a, chutihrualin team nem zawk pawh ni ta se Pep-a duhthlanna a nih miau avangin chak loh chhanah mawhpuh a rem lo thung.

Tuchel a class
Tuchel hian Borussia Dortmund a enkawl laiin Guardiola kaihhruai Bayern Munich vawi nga a hmachhawn a, a hneh lo vek. Amaherawhchu, German manager hian tawnhriat a ngah lehzual tawh a, Chelsea a enkawl meuh chuan manager ṭha huangah dah loh theih a ni lo.

FA Cup semifinal khelh hmain Tuchel chuan, "Man City leh Bayen Munich te hi team ṭha bik an a ni, kan inkar a la zau. Season tharah chuan elphak ngei kan tum ang," tiin a sawi a, London club hian season thar an nghak hman lo - FA Cup-ah an hneh nghal.

Chelsea-in Man City hi an hneh dan hi vanneih vanga chak a ni lo a, Tuchel-a'n Pep-a 'tactical battle-ah' a hneh avangin a ropui hle. Blues hian Timo Werner leh Hakim Ziyech te tlan chakna hmangin City defence leh keeper inkara hmun ruakah chat chat an nawr let a, goal pawh minute rukna lekah an khung nghal. Amaherawhchu Werner a offside hman avangin goal-ah pawm a ni lo.

Man City an insiamṭha thei lo a; Sterling, Torres leh Jesus te goal bawh a na lo. Player pathum hi dem theih an nih rualin Chelsea tlarhnunga awm Thiago Silva leh Antonio Rudiger te chu fak loh theih loh an ni. Germany international Rudiger hi Frank Lampard-a'n a chhawr ṭhat duh loh kha ni a, Blues-in club legend Lampard an ban ngam kha ti fuh an inti tawh khawp ang.

Rudiger hian goal a venghim ringawt lo a, ball ṭha a vawrh chhuak. Minute 55-naah counter attack aṭangin Chelsea-in goal an khung a, training ground-a tih niawma mawi a ni. Werner-a ball pek chu Ziyech-a'n awlsam takin goal-ah a khung. Kum 28 mi Ziyech hian chance ṭha dang a nei leh a, keeper Steffen chiah a hmachhawn hnuah a pet goal lo.

Man City-in chance mumal an nei thei lo a, Kevin De Bruyne-a inhliamin harsatna a belhchhah. Belgian midfielder thlaktu Phil Foden rawn nung ṭha viau mah se goal a keng tel lo. Hun tawp dawn hnaihah substitute Christian Pulisic goal khung chu offside vangin pawm a ni lo, Wembley Stadium-ah chak phu zawk Chelsea 1-0 in an chak.

Eng nge an sawi?
Chelsea manager Thomas Tuchel chuan, "Europe-a tun dinhmuna team ṭha ber kan tum chungin kan el pha a, chu chuan minti lawm. Chak turin vanneihna kan mamawh tel a, chutihrualin chak erawh kan phu hle. Man City hneh tur chuan kan ṭhat dan bera khelh a ngai a, chutiang tak chuan kan khel a ni," tiin a sawi.

Man City manager Pep Guardiola chuan, "Phil Foden leh Ilkay Gundogan te luh hnuah kan khel ṭha lehzual a, a tawp lam minute 15 kan khel ṭha. Amaherawhchu goal venhim tum player pariat an awm avangin a harsa em em a, hetiang ang inkhelah hi chuan team pahnih danglamna hi tlemte chauh a ni," tiin an vanduaia a ngaih thu a sawi.

Chelsea leh Man City hian Champions League semifinal an lut ve ve a, English club pahnih final-a inhmachhawn thei dinhmunah an ding. Man City hian Nilaini zanah Aston Villa an hmachhawn ang a, April 25, Pathianni zanah Tottenham Hotspur nen League Cup final an khel ang a, PSG nen UCL semifinal first leg an khel lehnghal dawn a, hmabak a hautak dawn hle.