Electric Veng an eng mawi ber

HPC Cup khelh zawh takah Electric Veng chuan TC Lalruatfela goal khat hmangin Pukpui 1-0 in an hneh a, a vawi nga nan Lunglei District Football Association hnuaia inelna sang leh ngaihhlut berah an champion.

Inrinni khan Ṭhuam-luaia Mualah final khelh niin, goal awmchhun hi minute 17-naah TC Lalruatfela chuan a khung a, ani hian Best Player leh Top Scorer lawmman dawng zuiin a team a champion pui.

HPC Cup hi vawi 10 neih tawh niin Electric Veng hian final vawi nga an lut a, an champion vek - record nei ṭha ber an ni. Kuminah hian an champion hmasak bera an player pali ngawt an la tel a, boruak sangah an tawnhriat neih a pawimawh.

Electric Veng hian squad an nei chhah a, Mizo midfielder hmuh-nawm berte zinga mi Lalrindika Ralte chu bench-ah an dah thei. Didika hi second half-ah inlanin goal khung theihna remchang a siam a, mahse an vannei zui lo thung.

A vawi khat nana final kheltu Pukpui lamin nomawi chawi lo mah se lawmna tur an ngah. Inelna an hmachhawn hnuhnung berah khan red card pahnih bakah yellow card 36 zet an chawi a, kuminah erawh 'Fairplay Award' dawng thei khawpin an khel mawi.