Copa del Rey champion Barcelona

Lionel Messi-a che ropui a, Barcelona an mawi leh ta - Inrinni zan khan Barcelona chuan Copa del Rey nomawi chawi turin Athletic Bilbao chu 4-0 in an sawp.

Barcelona tan Lionel Messi chuan goal hnih a khung a, Antoine Griezmann leh Frenkie de Jong-ten goal khat ve ve an khung bawk a, Bilbao-in a chhanletna tur an nei lo.

Bilbao hian April thlatir khan Covid-19 vanga a huna khelh theih loh Copa del Rey 2020 final-ah Real Sociedad an lo ngam lo tawh a, Barca lakah an tlawm leh ta - thla khat chhungin nomawi pahnih an beiseina a thamral.

Goal a sur
Barca-in goal khung tumin inkhel ṭantir aṭangin an nawr nghal a, mahse, Bilbao tan keeper Unai Simon-a chet ṭhat avangin Catalan club-in goal an khung thei lawk bik lo - Spanish keeper-in Antoine Griezmann leh Sergio Busquets pet a dante chu pui tak a ni.

Minute 60-naah erawh Simon a ding nghet reng thei bik tawh lo - Griezmann-a'n Barca goal hmasa ber a rawn khung a, French forward goal khung tur siamsaktu De Jong chuan minute thum hnuah a belhchhah leh bawk.

Goal hmasa ber an khung aṭangin minute riat a liam a, Messi hun a her chhuak - khelmual chanve vel aṭanga ball khalh lutin Argentine forward hian a khung a, minute 72-naah Jordi Alba siamsak chu an goal li nan a khung zui.

Fak tlak Messi
Messi-a chet ṭhat chuan Barca an che ṭha ṭhin a, Copa del Rey final-ah pawh Messi thiamzia bawk kan hmu nawn - a goal hmasa zawk khung tura De Jong nena ball inpe kual chunga a khalh luh dan chu hmuhnawm a tling a, a goal hnihna khung tura a finishing a tawih em em bawk.

A tawpa zawhna pawimawh ber erawh Messi chelh turin he nomawi hi a tling tawk ang em? tih chu a ni a, Barca president Joan Laporta chuan, "He hmunah hian cham a duh ang tih ka chiang a...a cham theih nan theihtawp kan chhuah ang," a ti.

Antoine Griezmann chuan, "He hmunah hian Messi a hlim a, nipuia thil thleng tur chu kan kuta awm a ni lo. Thutlukna chu aman a siam mai ang," a ti ve bawk - Messi tan nomawi hi Barca tana nomawi 35-a chawina a ni a, 2018-19 season hnua Catalan club nomawi hmasa ber a ni bawk.

Koeman thukhawchang
Barcelona-in Ronald Koeman hnuaiah a vawi khat nan nomawi an chawi a, Dutch coach hma hun chiang lo chu a chiangah ngaih a ni - league nomawi chawi lo pawh ni se season khat tal chu la cham turah khawthlang media-ten an ngai.

Koeman chuan, "Nomawi chawi hi ka tan a pawimawh em em a ni. Club-ah inthlak danglamna awmin, player naupang tak tak kawl mah ila, Barca-ah chuan nomawi hlawhchhuah tuma beih reng a ngai.

"Tunah chuan kan nomawi hmasa ber kan chawi ta a, La Liga-ah a tawp thlengin kan ṭang ang," a ti a, tawp mai a tum lo - league nomawi an chawi thei a nih chuan Messi cham pawh an beisei ngam ang.