Newcastle lakah West Ham an chak lo : Hliam vangin Harry Kane an la chhuak

Season duhawm hmangtu West Ham United chu Newcastle United lakah 3-2 in an chak lo a, season thara Champions League khelh an beiseina chu dinhmun hlauhthawn awmah a ding chhunzawm nghal - match khat chetsual lekah an hniam duai thei tawh dawn.

Zirtawpni zan Premier League inkhelah Everton leh an mikhual Tottenham chu 2-2 in an inhnehtawk tawk. Spurs striker Harry Kane chuan goal hnih khung mah se kerek hliam vanga lakchhuah a ngai; April 25 zana League Cup final an khelh tur atan a dinhmun a chiang lo.

Hammers an tlawm
St. James' Park a inkhelah West Ham defender Craig Dawson chu minute 36-naah hnawhchhuah a ni a, Hammers tlarhnung dawltu pakhat Issa Diop chuan anmahni lamah a ti lut bawk. Joelinton-a'n goal a neih bawk avangin chawlhlawk laiin Newcastle dinhmun a ṭha takzet.

Goal hnih an nei a, player pakhatin an tam zawk avangin Newcastle hi nuamsa taka chak tura ngaih an ni. Mahse, Diop-a'n si phurh a sut bakah Jesse Lingard-a'n penalty a khung a, 2-2 a ni der. Substitute Joe Willock chuan Magpies chakna goal a tauh lut hram.

Steve Bruce naute hi table-ah 15-na an ni a, tla thei china awm Fulham aiin point kua zetin an sang fal ta - chhiarkawp danin la tla thei mah se EPL khel zel turin an dinhmun an siamṭha zel, him tur erawh chuan point 40 tal an sual chhuah a ngaiin a rinawm.

Chak lo Hammers erawh an tum ram thlen a harsa sawt dawn. David Moyes naute hi palinaah an la awm, amaherawhchu an elpui Chelsea leh Liverpool aiin match khatin an khel hnem. Blues leh Reds hian an khelh hmabakah hnehna an chan chuan West Ham hi paruknaah an awm daih thei dawn.

Kane a inhliam
Harry Kane-a'n goal ṭha tak pahnih khung mah se Gylfi Sigurdsson-a'n goal hnih bawk a khung ve tho a, season thara European football khelh tum pahnih Everton leh Tottenham ten point khat ve ve in an insem a ngai.

Jose Mourinho naute hian Nilaini zanah Southampton nen league match an khel zui dawn. April 25, Pathianniah Manchester City nen League Cup an khelh dawn a, inkhel pawimawh atan an striker ṭha ber dinhmun a chiang ta lo.

Spurs manager Mourinho chuan, "A dinhmun sawi nan chuan a la hma mah mah deuh. Kei chuan inkhel se tih hi ka duh dan a ni a, harsatna a neih zual kan hlauh avangin kan la chhuak," tiin a player pawimawh chungchang a sawi.

English striker Kane hian season kal laiah league goal 21 a khung tawh a, Premier League season nga zet chu goal 20 a khung tling ta. Season sarih ngawt goal 20 khung thei Alan Shearer leh Sergio Aguero (6) te record pawh a la nihrual chhoh theih a beiseiawm.