Point hloh a hun tawh lo - Klopp

Liverpool boss Jurgen Klopp chuan Premier League-a top four kai tura an beihnaah point hloh thei an nih tawh loh thu a sawi a, Reds hian zanin dar 12:30-ah league match khel turin Leeds United an lenchilh ang.

Klopp chuan, "Top four kai hi kan tan a pawimawh a, kan hmaah final pasarih a inchhawp ang hial a ni. A tawpah chauh kan point mamawh tak tak hi chu kan hre dawn chauh a, mahse, ka lo sawi fo tawh angin hun leh point khawhral a hun tawh lo," a ti.

Liverpool hian tun season-ah nomawi an chawi thei tawh lo - Premier League-ah top four chu an beiseina a ni a, FA Cup, League Cup leh Champions League aṭangin an tla tawh bawk.

Premier League-ah erawh Liverpool an insiamṭha mek a, Wolves (1-0), Arsenal (3-0) leh Aston Villa (2-1) te chu a zawnin an hneh tawh a, Leeds khelmualah pawh chak chhunzawm an beisei ang.

Klopp chuan, "Kar hnih thum liam taah kha chuan point kua velin top four kan hlat a, Leicester, Chelsea leh West Ham-te kha kan umphak theihah an awm tawh lo ang maiin a lang a ni.

"Tunah pawh keini aiin an la sang ngei a, mahse, tun hnai kan result hian pressure-a pe em em ang. Tunah chuan kan result ṭha takte chhunzawm a hun leh ta," a ti a, top four beiseina a la bo lo.

Liverpool hian inhliam tharlam nei rih lo mah se Joe Gomez, Jordan Henderson, Joel Matip leh Virgil van Dijk an la chhawr thei lo reng a, mahse, an player palite hian ngai an awh chhoh thu Klopp chuan a sawi.

Hetihlai hian Leeds tan winger Raphinha leh striker Rodrigo dinhmun a chiang lo a, captain Liam Cooper chu an match hnuhnung bera a red card avangin a inlan thei dawn lo bawk.