Republic of Ireland boss thar tur Kenny
Stephen Kenny chuan manager tawnhriat ngah Mick McCarthy thlakin Republic of Ireland coach hna a chelh dawn a, Football Association of Ireland (FAI) chuan an thutlukna hi an puang a ni.
Irish FA ruahmanna hmasaah pawh Kenny hi an ram coach tur a ni a, mahse Euro 2020 zawhah chauh an ram team enkawl hna hi thawk tura tih a ni.
Mahse, coronavirus hri leng vangin Euro playoff leh a inelna tak khelh hun tur pawh nakkumah sawn a ṭul a, hetiang a nih tak avang hian McCarthy leh Kenny be rawn chungin FAI hian thutlukna an siam ta a ni.
FAI chuan thuchhuah siamin, "Mick McCarthy chu national team manager a nihna aṭangin Stephen Kenny chuan a thlak a ni tih Football Association of Ireland chuan kan puang a, manager pahnih rem tihnaa he thutlukna hi siam a ni," an ti.
Kum 61 mi McCarthy hian July 31 thleng contract a nei mek a, hei hi Euro 2020 khelh zawh tawh lam a ni. Under 21 team enkawl mektu Stephen hi August 1-a senior team enkawl ṭan tura tih a ni thung.
Mahse, Covid-19 vanga engkim a buai takah chuan Stephen hian a tum aia hmaah Ireland a enkawl dawn a, kum tawp lama Euro playoff semifinal-a Slovakia an hmachhawn tur atan inbuatsaihna hma zawkin a nei thei dawn tihna a ni.
Stephen Kenny hi an ram football-ah chuan coach langsar ber pawl a ni a, November 2012 - November 2018 inkara an ram club ṭha Dundalk a enkawl khan hming a chher hle.
Dundalk-ah hian league nomawi vawi li a chawi hman a, Irish football-a nomawi chawi theih zawng zawng chu a chawi kim.