Olympic atan Kipchoge a inpeih

Olympic champion leh world record holder Eliud Kipchoge chu Tokyo Olympic hmaa inelna hnuhnung ber Twente-a neih NN Mission Marathon-ah pakhatna a ni a, August thlaa Olympic neih hunah gold medal la tura rinkai lawr lak a ni ang.

Nimina inelna neihah hian Kipchoge hi darkar hnih leh minute li leh second 30 chhungin a thleng. Kenyan mi tho Jonathan Korir chu 2:06:40 ah a thleng a, a tlan ṭhat ber ṭumah a hnampui Kipchoge hi a pha lo.

Marathon runner zinga ropui ber ang hiala chhal Kipchoge hian kum 2013 hnua a vawi khat nan kum 2020 khan London-ah lawmman a la pha lo a, pariatna a ni pha chauh. Tunah erawh Kipchoge hi a insiamṭha tawh tih a hriat a, Olympic hmachhawn turin a inpeih tawh.

NN Mission Maratho hi ruahmanna hmasaah chuan April 11 khan Hamburg-a tlan tur a ni a, amaherawhchu Covid-19 vangin Twente Airport, Netherlands-ah an tlan ta zawk.

Kum 36 mi Kipchoge chuan, "Ka tum ka ti hlawhtling e. Hun chep tak kara hlawhtling taka inbuatsaihtute ka chhuang hle. Covid-19 boruak karah marathon inelna a buatsaih theih tih kan lantir a ni. Olympic atana inpuahchahna ṭha tak a ni a, tunah chuan inelna hmachhawn turin kan inpeih tawh," tiin a inringtawk hle.