Tuikual North an kang sang

Aizawl District Volley-ball Association buatsaih, D-3 Business Enterprise Super League Volleyball Tournament chu R. Dengṭhuama Hall-ah khelh chhunzawm zel a ni a, vawi nga chak tawh Tuikual North chuan hma an hruai mek.

Inrinni khan Tuikual North hian an khingpui Dinthar chu 3-1 (25-20, 21-25, 25-16, 25-20) in an hneh a, match ruk an khelh aṭanga vawi nga an chakna niin, anni aia chak hnem an awm lo.

Inkhel dangah Ṭhuampui chuan Hlimen 3-1 (29-31, 25-21, 25-21, 25-14) a hnehin pahnihna dinhmun an luah ve bawk a, an chunga awm Tuikual an phak lohna chu point khat chauh a ni.

Vawiin hian a hmun ngaiah khelh chhunzawm a ni leh dawn. Pathumna ni lai Armed Veng South leh an hnuai chiaha awm Martin Volleyball Club an inhmachhawn ang.