Clay court-ah Nadal a chak lo

Rafael Nadal chu Andrey Rublev hneh loin Monte Carlo Masters khelh laiah quarterfinal paltlang zo loin a tla. World number 1 Novak Djokovic pawh round hmasa lamah a zinkawng a lo tawp ve tawh bawk.

Zirtawpni zan inkhelah Nadal hi 6-2, 4-6, 6-2 in a chak lo a, a vawi 12 nana Monte Carlo Master title lak a tumna chu a thlawn, a inkhelh thiamna clay court-ah duhthusamin season bul a ṭan fuh lo.

Grand Slam vawi 20 champion tawh Nadal chuan, "Clay court season ṭha tak hman ka duh a, hetianga ka chak lo mai hi pawi ka ti hle. Inelna ka hmachhawn reng rengin chak ka tum ṭhin, tun ṭuma ka chak lo pawh hi a pawi ka ti takzet," a ti.

Nadal hnehtu Rublev hian semifinal-ah Casper Ruud chu straight set-in a hneh chhunzawm a, nizan khan Greek rawlthar Stefanos Tsitsipas nen nomawi an inchuh a, result erawh kan hre hman lo.

May thla tawpa khelh tur French Open inbuatsaih nan Rome Open chu thla leh tir lamah khelh a ni dawn a, world number 1 Djokovic leh number 3 Nadal te pawh an inlan leh ang.