Chennai leh Mumbai an chak

Indian Premier League-ah Zirtawpni zan khan Chennai Super Kings-in wicket rukin Punjab Kings an hneh a, Inrinni zanah Mumbai Indians-in Sunrisers Hyderabad run 13-in an hneh ve bawk.

Zanin hian Chennai Super Kings hian Wankhede Stadium, Mumbai-ah Rajasthan Royals an hmachhawn ang.

Zirtawpni zan inkhelah Chennai captain MS Dhoni-a'n vawm hmasak a thlang. Punjab batsman zingah Shahrukh Khan-a'n run 47 a siam a, batsman dang erawhin Super Kings bowler Deepak Chahar (13/4) an ngam lo a, run tih tham an siam lo.

Chennai tan target 107 hi a awlsam a, Faf du Plessis-a'n thi loa run 36 a siam zarah leh Moeen Ali-a'n run 46 a siam zarah over 15.4 lekah hnehna an chang.

Inrinni zanah Mumbai Indians-in bat hmasak an thlang. Mumbai hian Quinton de Kock (40), Kieron Pollard (35*) leh Rohit Sharma (32) te hmangin run 150/5 an siam.

Hyderabad opener David Warner (36) leh Jonny Bairstow (43) ten bul ṭan ṭha mah se batsman dang an che ṭha lo. Mumbai bowler Trent Boult (28/3) leh Rahul Chahar (19/3) te an che ṭha a, Hyderabad hi over 19.4 naah run 137 chauh an siamtir a, IPL champion lai Mumbai-in run 13-in hnehna an chang.