Lille-in point an hloh

French Ligue 1 cham-pion nih tum Lille chu Zirtawpni zan khan Montpellier nen 1-1 in an inhnehtawk a, point hnih an hloh ṭhen tak avangin league nomawi chawi an tumna chu a derthawng sawt.

Montpellier tan Andy Delort-a'n minute 21-naah goal hmahruai a khung a, goal an neih hnuah tlarhnung venhim an ngaih pawimawh avangin an inveng rei thei hle - a tawpah erawh an inveng seng bik lo.

Ball possession 64% neitu Lille lamin na takin an nawr, hun tawp hma minute nga chauh awm tawhah Luiz Araujo chuan si phurh a sur hram a, goal dang lut loin point khatah an lungawi a ṭul.

Lille hian league match 33 aṭanga point 70 hmuin hma an la hruai chhunzawm. Nizan khan champion lai Paris Saint-Germain chuan Saint Etienne an mikhual a, Paris club hi an chak a nih chuan hmahruaitu nen an inkarah point khat chauh a awm tawh ang.