Goa-in Al Wahda an chelh

FC Goa-in AFC Champions League-ah hnehtu an la tawng lo - an match hmasa berah team ṭha Al Rayyan chu 0-0 a an inhnehtawkpui hnuin Al Wahda chu 0-0 bawkin an inhnehtawkpui.

Pathianni zana Goa inkhel hi Al Rayyan nen erawh tehkhin chi a ni lo - Al Wahda lakah vannei se, Goa hi chak thei an ni hial.Goa tan Brandon Fernandes chuan goal post a tih per a, Jorge Ortiz leh substitute Devendra Murgaonkar-te hriam hret se, goal khung ngei tur an ni bawk.

Al Wahda hian chance nei lo an ni bik lo - mahse, Asian Player of the Year lo ni tawh Omar Khribin, United Arab Emirates (UAE) captain hlui Ismail Matar, thla hmasa lawka 6-0 a UAE-in India an sawp ṭuma goal khungtu Khalil Ibrahim leh Slovenia international Tim Matavz-ten an chance neih an chhawr thei lo.

Champions League 'Team of matchday One' a lang phak Dheeraj Singh bawk chu fak phu a ni a, Manipur keeper hi Al Wahda player-ten an paltlang thei lo - injury time-a Omar Khribin-a hun ṭha nei hnai set sawt aṭanga a dante chu pui tak a ni.

Al Wahda coach Henk ten Cate chuan, "Goalkeeper an nei ṭha em a ni," tiin goal an khung loh chhan a sawi a, Goa coach Juan Ferrando chuan a naute fakin, "Ni tin hna kan thawk ho a, an theihna ka hrechiang a ni," tiin a sawi - match hnihah point hnih an nei ta.