Premier League-ah Norwich City an kir

Inrinni zan Championship inkhelah Brentford leh Swansea te an chak zawh loh avangin league hmahruaitu Norwich City-in season tharah Premier League an khel dawn.

Canaries hian Premier League an khel dawn tih an inhriat hnuah Bournemouth an hmachhawn a, 3-1 in an chak lo. Daniel Farke hoten hnehna chang lo mah se inkhelh banah Carrow Road-ah an hlawhtlinna chan an lawm chiam.

Championship aṭang hian Premier League khel turin a sang pahnih an tling nghal a, pathumna aṭanga paruknain playoff hmangin hmunruak pakhat an inchuh leh bawk. Norwich hi pathumnaa awm Swansea-in an umpha thei tawh lo.

Norwich boss Daniel Farke chuan, "Kan hlawhtlinna hi kan fan-te tan kan hlan. Covid-19 vangin hun harsa tak an hmachhawn a, hun harsaa lawmna kan siamsak thei hi kan lawm hle a ni," tiin a sawi.

Kum 44 mi Farke chuan sawi chhunzawmin, "An chau loh chhung chu player-ten Premier League khel tura kan tlin an lawm thei ang. Kei erawh ka upat deuh tawh avangin rei tak lawm ka tlin ta lo a, mahni in luma awm ka thlahlel zawk," tiin Thawhlehni zanah inkhelh tur nei mah se a naute chu an duh thala lawm a phalsak.

Norwich City hian Thawhlehni zan dar 10:30-ah pahnihnaa awm Watford an hmachhawn dawn a, Cannaries hian hnehna an chang a nih chuan season thum chhunga vawi hnih nan Championship-ah an champion thei ang.

Canaries hian season liam ta khan match thum khelh tur a la awm tihin West Ham 4-0 in an hneh lo a, an relegate. Norwich hian Premier League match hnuhnung 10-ah chak an neih loh avangin relegate hi an phu hrim hrim a, chutihrualin season khat chiah Championship-a an awm hnuah Premier League an khelh leh dawn avangin Daniel Farke leh a hoten fak an phu hle.