Rawlthar Joseph-a‘n Muanawma a ngam

Mizorama badminton inelna sang ber 35th Mizoram Badminton Association Official Championship chu Inrinni khan khelh zawh a ni ta a, Men‘s Singles-ah Joseph V. L Ringngheta, ITI Badminton Club chuan Mizoram Police BC player Lalmuanawma chu 27-25, 21-13 a hnehin a champion.

Ramhlun Indoor Stadium leh Bawngkawn YMA Hall-in a thlen, Mizoram badminton-a ranking point nei sang ber inelnaa Men‘s Singles champion Jojo-a hi kum 18 mi niin he inelnaa final lut thei naupang ber a ni a, qualifying aṭanga inelna khel ṭan, champion thei hmasa ber a ni bawk - inelnaah hian ranking-a sang pariat chin chu qualify sa an ni.

Jojo-a hian Under 19 Boy‘s Singles-ah Saitluangpuia chu 21-18, 21-16 a hnehin a champion bawk - Saia hi kum 15 mi lek niin Under 17 Boy‘s Singles-ah a champion thung.

Women‘s Singles lamah MBA senior ranking tournament-a final lut thei naupang ber record siamtu, kum 14 mi Rebek Lalremruati chuan kum 19 mi Lalrinhlui 21-13, 21-9 in a ngam lo.

Under 13 boy‘s singles-ah Malsawmhlua a champion a, Abigail Lalṭhazuali chu U17 leh U19 Girl‘s Singles ah a champion kawp bawk.