Durtlang nge Zarkawt tla dawn?

Mahuma Memorial 1st Division Screening Tournament hmawr bawk a hnai a, tualchhung cricket inelna sang ber aṭang hian team pali an tla dawn. Vawiin chawhma dar 9:30 hian tla thei dinhmuna ding Zarkawt Lords leh Durtlang an inhmachhawn ang.

Team pahnih hi match sarih an khelh china vawi thum chak ve ve an ni a, tun ṭuma an inkhel hi a pawimawh dawn. Point hmuh zat inangah Net Run Rate nei ṭha zawk Lords an sang zawk mek.

Zarkawt team hian an league match hnuhnung berah Zemabawk Pitchers an hmachhawn leh dawn, an intawn hunah meuh chuan Zemabawk hi an tla fel hman tawhin a rinawm. Durtlang hian final khelh beisei ngam Kulikawn an tum leh thung ang.

Inrinni khan Suaka Cricket Ground, Sih-hmuiah inkhel pakhat a awm a, final khelh tum Chanmarians (149/7) chuan Bawngkawn South (52/10) chu run 97 ngawtin an hneh a, table chung berah an awm.

Chak lo Bawngkawn South erawh match sarih an khelh chinah chak ni hmel an hmu lo a, khelh hmabak pakhat la nei mah se an tla chiang tawh.