EPL aṭangin Sheffield United an tla

Premier League aṭangin Sheffield United kan mangṭha a ngai ta, league match khelh hmabak paruk la awmah manager lailawk Paul Heckingbottom enkawl team hi chak vek pawh ni se an inhmangtang thei tawh dawn lo.

Inrinni zan Molineux Stadium-a inkhelah Willian Jose chuan Wolves tana a goal hmasa ber a khung a, an mikhual Sheffield chu 1-0 a an hneh bakah English football inelna sang ber aṭangin an pet chhuak tel nghal bawk.

Blades hian season tir lamah khan league match hmasa 13 aṭangin point khat chiah an hmu a, match 32 an khelh chinah hian point 14 chauh an la nei - EPL aṭanga an tlak ni hian Championship lam aṭangin Norwich City chu an kaisang dawn tih a chiang ve thung.

Sheffield manager Heckingbottom chuan, “Premier League khelh leh chu kan tum pui ber a ni ang. Tuna kan club zinkawng ngaihnawm tak hi League One aṭanga inṭan tawh a ni a, thawnthu hi a tawp mai tur a ni lo.

“Norwich, Watford leh Bournemouth te hi en ila, nikum lawka tla kha ni mah se Championship lamah ṭha takin an khel thei. A pawimawh ber chu player chhuak darh loa kan awmkhawm theih a ni ang,” tiin a rang thei ang bera Premier League khelh leh an duh thu a sawi.

Zirtawpni khan Sheffield United chairman Prince Musaad Bin Khalid Al Saud chuan a hna a bansan tawh a, club neitu Abdullah bin Musa‘ad bin Abdulaziz Al Saud tan team din thar leh tur chuan pawisa sen ngam a ngaiin a rinawm.