Bayern leh Flick an inṭhen dawn?

Bayern Munich-in Inrinni zan Bundesliga inkhelah Wolfsburg 3-2 in an hneh a, inkhelh bana sawi zui hlawh zawk erawh manager Hansi Flick-a chhuah tur thu a ni.

Kum 56 mi Flick hian Allianz Arena-ah June 2023 thleng contract nei mah se club hruaitute hnenah season tawpa chhuah a duh thu a hrilh. Bayern boss hi Germany national team coach ni tura ngaih a ni a, European Championship zawhah coach Joachim Low a chhuah dawn avangin Flick hi a thlakna turah an ngai.

Musiala a 'cial'
Volkswagen Arena-ah Bayern Munich-in Jamal Musiala (15', 37') goal hnih leh Eric Maxim Choupo-Moting (24') goal hmangin Wolfsburg 3-2 in an hneh. Wolsburg hian 2-0 a nih hnu leh 3-1 a nih hnuah Wout Weghorst (35') leh Maximilian Philipp (54') te hmanga goal an khung avangin hun tawp thlengin inkhel a nung.

Kum 18 mi Musiala hi Bundesliga history-a goal ruk khung thei naupang ber a ni a, first half-ah goal hnih a khung tawh vangin second half-ah hattrick siam tumin bei ngial mah se a khung belh thei tawh lo.

Bayern hian match 29-ah point 68 hmuin pakhatna dinhmun an sawhnghet a, anmahni hnaih bertu RB Leipzig erawh Hoffenheim nen goal awm loin an inhnehtawk. Leipzig hian point 61 an hmu tawh a, match nga khelh tur la awmah Bayern hi point sarihin an pha lo.

Flick a chhuak dawn?
Bayern Munich hian Wolfsburg hma hian Paris-ah PSG hneh mah se an muala an chak loh avangin Champions League aṭangin an tla. Flick chuan French champion an hneh loh zawh hian club hotute hnenah contract tihtawp a duh thu hi a hrilh tawh a, Wolfsburg nen an inkhelh zawh hian player-te a hrilh leh bawk.

Flick chuan, "Ka contract tihtawp ka duh thu hi vawiinah ka player-te ka hrilh a, kar liam ta khan club hotute kan hrilhl tawh bawk. Ka hmalam hun tur hi a chiang lo. Germany enkawl hi chu coach zawng zawngin ngaihtuahna an senna tur a ni a, amaherawhchu tun ṭuma ka thutlukna siamna nen a inzawm lo," tiin Bayern-a contract tih tawp a duh chhan chu Germany a enkawl duh vang a nih loh thu a sawi.

Flick hian kum 2019 Bayern hi Niko Kovac-a assistant ni turin a zawm a, Croatian manager an ban hnuah Bavarians hi enkawl ṭan. Flick hian German club hi Bundesliga, DFB Pokal, DFL-Supercup, Champions League, UEFA Super Cup leh FIFA Club World Cup-ah a champion pui tawh a, tun season-ah Bundesliga nomawiin a nghak leh mek.

Bayern Munich ṭantuten Flick hi cham turin an duh a, club hotuten an manager thutlukna hi an zahsak ang em tih chu zawhna hriat châkawm a ni ta. Flick hi sporting director Hasan Salihamidzic nen thuneihna an inchuh avangin an inkarah boruak ṭha lo a awma ngaih a ni a, hemi a nih avang hian Bayern hian Flick hi an chelh a rinawm loh. German champion enkawl tur hian RB Leipzig manager Julian Nagelsmann chu rinkai ber a ni.