Serie A thuneitu in hawng zau
Italian Football Association president Gabriele Gravina chuan Serie A season kal lai khelh zawh theih hram an la inbeisei thu a sawi a, a ṭul a nih chuan September emaw October emaw thleng pawh nise an pawh sei mai tur thu a sawi.
Covid-19 vangin March 9 aṭang khan Italy rama football inelna sang ber hi chawlh rih a ni a, hri leng vang hian an ramah mi 15,887 chuangin an thih phah tawh; tuna a lan dan chuan infiamna lam hi thar thawh chiam chi a la nih hmel loh hle.
Serie A club President tam tak chuan season kal lai chu tih tawp mai an duh thu an lo sawi tawh. Mahse, Gravina chuan, "Thil thleng thei leh a nghawng tur tam tak ngaihtuah chunga thutlukna siam a ngai.
"Hun harsa paltlang theih dan tur hi kan ngaihtuah ṭheuh a, season kal lai hi nasa taka pawt seiin, nakkum lama season kan hman tur a nghawng a nih pawhin insiamrem dan a awm chuan a pawi lo thei bawk," tiin a sawi.
Season kal lai tih tawpin a nghawng theih chungchang sawi zuiin Gravina chuan, "May 17 hi inkhelh leh theih kan beisei hun kha a ni a, mahse hei chu rilru lam lo ruahman lawkna mai a ni.
"Season hi ti tawp ta ngawt ila division hniama tla tur leh rawn kaisang turte hi nasa takin sum leh paiah a nghawng dawn. European football khel tur pawh sum an ngah deuh a nih pawhin a nghawng na dawn tho, nakin zela kan ṭhat tlanna tur ber hi hriatthiam a har rih," a ti.