Training neih rual a ngai - Ancelotti
Everton manager Carlo Ancelotti chuan Premier League club-te inrualkhai taka an chet a pawimawh thu a sawi a, Everton manager Carlo Ancelotti chuan Premier League club-te inrualkhai taka an chet a pawimawh thu a sawi a, season kal lai an chhunzawm leh dawn a nih chuan training an neih leh ṭan hun tur chu inrual thei se a duh thu a sawi.
English football hi Covid-19 vangin an chawl mek, beiseina hmasaah chuan May 3 velah chuan khelh leh theih rin a ni. Mahse, tuna England ram dinhmun thlir chuan an khelh mai a la rinawm loh.
Ancelotti chuan, "Player tinte mahni in lamah an theih ang tawk tawkin an insawizawi ṭha hle tih ka hria, thu hriat nuam leh lawmawm tak a ni. Club lam pawhin a huhoa training neih theih hun kan nghakhlel hle.
"Amaherawhchu, club malin mahni duh hun huna training lo neih ngawt kha a fuh lo thei, duhthusamah chuan thuneitu lamin training neih ṭan hun hi ruahman se, ni inangah a bul ṭan thei ila," a ti.
Kum 60 mi Ancelotti hian player a nih lai leh manager a nih hnuah Champions League nomawi a chawi tawh. Italy, Germany, France leh England-ah te team enkawl hna hlawhtling taka lo thawk tawh a nih avangin tawnhriat a nei ṭha tawk.
Italian manager chuan sawi zawmin, "May 3-ah league kan nei chhunzawm a nih chuan player ten chawlhkar sarih chhung vel a huhoa training nei loin an khel thut dawn tihna a ni a, chumi hma chuan inbuatsaihna a awm ngei a ngai tihna a ni.
"Everton player leh staff zingah hri leng kai an awm lo a, thil hriat ngai leh pawimawh chu ṭha takin kan inhrilh thei reng. Mahse, football chu phone leh computer aṭanga tih vek chi a ni lo, a huhoa inbuatsaih ngai chi a ni," a ti.