BWF-in world championship ngaihtuah dawn
Badminton World Federation chuan nakkuma neih tur World Championship kalpui dan tur an ngaihtuah dawn. Tokyo Olympic nen a hun a innanchin dawn avangin sawn emaw ṭhulh emaw a ngaih hmel.
Badminton World Championship hi kalphung pangngai ang chuan Olympic neih kumah an nei ngai lo, nikumah neih niin kumin hi an neih loh ṭum tur a ni - nakkumah an nei leh chiah ang.
Mahse, kumina neih tur Tokyo Olympic chu nakkum atan sawn a ni a, hei hian inelna dang a nek buai phah dawn ta a ni. Inelna dang pawh nghawng buai a nei nual dawn.
BWF chuan thuchhuah siamin, "2021 World Championship hi August thlaa neih tura tih a ni a, a thlengtu tur pawh Spain an ni. Tunah erawh kan ruahman angin thil a kal thei dawn lo, inelna hi kum 2022-ah vawi hnih neih emaw, nakkuma khelh hun sawn pawh tih theih a ni," an ti.
World champion ni lai PV Sindhu chuan nikuma a title lak chu hun rei tak kawl ngawt a fuh loa a hriat thu a lo sawi tawh a, a theih anga hmain world championship chu awm leh se a duh thu a lo sawi tawh bawk.
Khawvel pumah coronavirus vangin badminton inelna an chawl vek. April 12-a khelh zawh tak All England Championship hnu lamah tournament buatsaih a la awm leh rih lo.
Nakkuma neih tur World Athletics Championship chu 2022 atan an lo sawn hla tawh a, World Aquatics Championship pawh kum khat atan sawn hlat a ngaih hmel ta hle.