City an tlo; Wolves-in United an pet tla

Manchester City chuan quadruple beiseina chawi nung turin Swansea laka goal hniha an hnufual hnuah an tho chhuak leh a, 3-2 in an chak. Manchester United erawh Molineux Stadium-ah Wolverhampton Wanderers 2-1 in an hneh lo a, Ole Gunnar Solskjaer hote tana nomawi beisei theih chu Champions League chiah a ni ta.

Man City leh Wolves bakah Crystal Palace hnehtu Watford ten FA Cup semifinal an lut a, nizan khan semifinal hnuhnung berah Millwall leh Brighton & Hove Albion te an inkhel a, result kan hre hman lo.

Thiam leh vannei inkawp
Liberty Stadium-ah Swansea-in bul an ṭan fuh. Minute 20-na lekah Matt Grimes-a penalty hmangin Swans-in hma an hruai a, minute kaw hnuah Man City tlarhnung ṭhiat darhin Bersant Celina chuan mawi zetin a hmawr a bawk.

First half-ah rin loh zawk Swansea-in 2-0 in hma an hruai a, Manchester City chu tla thei dinhmunah an ding. Amaherawhchu second half-ah Sergio Aguero leh Raheem Sterling te lutin an tho chhuak.

Man City goal nawr a nat avangin Swansea an talbuai a, defender ball clear ṭha tawk lo aṭangin Bernardo Silva chuan minute 69-naah mawi zetin an siphurh a sut ṭhen. Substitute Sterling chuan Cameron Carter-Vickers lak aṭangin a hlawh chhuak a, Aguero chuan penalty petin goal ban pet per mah se keeper Kristoffer Nordfeldt hnung a per hnuah a goal ta tho - Man City an vannei.

Minute 88-naah Bernardo chuan vei lam aṭangin a cross a, Aguero chuan a tauh lut. Replay en let chuan Argentine forward hi a offside a, VAR hman a nih loh avangin Premier League club an vannei a, 3-2 in an chak.

Man City boss Pep Guardiola pawhin, "Offside a ni a, pawi ka ti hle. Hetiang chin tawha VAR hman a ni lo hi ka hrethiam lo a, season tharah chuan an hman tawh ngei ka beisei. Penalty kan khung danah pawh kan vannei a, mahse inelna palia beisei nei vek tur chuan vanneihna hi kan mamawh a ni," tiin a sawi.

FA Cup-ah hian VAR hman a ni tawh a, amaherawhchu Premier League club khelmualah chiah hman a nih avangin match zawng zawngah hman a ni lo.

United 'party' a tawp
Ole Gunnar Solskjaer hnuaiah Manchester United-in hartharna an chang a, Paris Saint-Germain an lehthal lai chu an thlen san lai ber ni mah se hemi hnu hian hnuh hniamin an awm. United hian Premier League-a an elpui Arsenal an hneh loh hnuah Wolverhampton Wanderers lakah 2-1 in an chak lo a, vanduai vang ni loin chak phu khawpin an khel chhuak zo lo.

United goalkeeper Sergio Romero chu David De Gea aiah lutin Argentine keeper hi mawhphurtu a ni lo a, Diogo Jota leh Raul Jimenez te goal khung tur a dang ṭha hle. Amaherawhchu Wolves lamin inkhel an thunun rah sengin minute 70-naah Mexican striker Jimenez chuan goal hmahruai a khung a, minute ruk hnuah Jota-a'n a khung belh leh bawk.

Manchester United mualpho belhchhahna tur chu VAR-in chhanin Victor Lindelof chu referee-in Martin Atkinson-a'n red card a pek hnuah VAR hmangin yellow card-ah thlak a ni a. Injury time-ah Marcus Rashford-a'n scoreline lan mawi nan a khung a, chak phu zawk Wolves-in semifinal an lut.

Manchester United manager Ole Gunnar Solskjaer chuan, "Kan ball chan zat leh pass dan te thlirin kan hnung tawlh nasa hle. Goal hmaah kan hriam lo a, first half-a inkhel tlema kan thunun pawh khan min vuak let theihna turin kan pass fimkhur tawk ṭhin lo," tiin an khelh danah a lungawi loh thu a sawi.

FA Cup - Quarterfinal
March 16, Inrinni
Watford 2 - 1 Crystal Palace
WAT : Etienne Capoue 27'; Andre Gray 79'
CRY : Michy Batshuayi 62'
Swansea City 2 - 3 Manchester City
SWA : Matt Grimes 20' (P); Bersant Celina 29'
MANC : Bernardo Silva 69'; Kristoffer Nordfeldt 78' (OG); Sergio Agüero 88'
Wolverhampton 2 - 1 Manchester United
WOL : Raul Jimenez 70'; Diogo Jota 76'
MANU : Marcus Rashford 90+5'
March 17, Pathianni (Result hre hman lo)
Millwall 7:30 PM Brighton & Hove