Arrows-in Blasters an thawn haw

Indian Super League qualification round-ah match khat chiah khelh a ni a, inkhel awmchhunah hian Indian Arrows chuan Indian Super League club Kerala Blasters chu 2-0 in an hneh.

Arrows tan hian Amarjit Singh chuan goal hnih a khung a, kum 18 mi midfielder hian minute 39-na lekah mawi zetin goal hmahruai a khung a, second half-ah an goal hnihna khung leh bawkin an chak - Arrows tan hian Mizo rawlthar Lalengmawia chuan inkhel bul a ṭan.

Hetihlai hian I League club pariat zetin Super Cup an khelh loh tur thu an sawi a, heng zingah hian qualification round aṭanga inlan tura tih Minerva Punjab, Gokulam Kerala leh Aizawl FC an tel.

Club pathum inlan loh avang hian an hmachhawn tura tih Pune City, Delhi Dynamos FC leh Chennaiyin FC te chu qualification round khel loin round of 16 an lut.

Round of 16 hi March 29-ah khelh ṭan tur a ni a, Chennaiyin leh Mumbai City an inkhel ang.