F1 season ṭannaah Bottas pakhatna

Formula 2019 season chu Pathianni khan Melbourne-ah tlan ṭan a ni a, Valtteri Bottas chuan Mercedes-a a teammate Lewis Hamilton hmaa tlanin Australian Grand Prix-ah pakhatna a ni.

Mercedes driver Bottas hi Finn zinga Melbourne-a pakhatna ni thei pathumna a ni a, kum 1999 khan Mika Hakkinen chuan nomawi chawi tawhin 2007 leh 2013 kum khan Kimi Raikkonen pakhatna a ni leh bawk.

Pakhatna Valtteri Bottas chuan, "Ka tlan ṭhat ber ṭum a ni hial ang. Bul ka ṭan ṭhat kha pakhatna kan nih theih nan a pawimawh a, team leh mimal ang pawhin kan result-ah ka lawm hle," tiin a sawi.

Mercedes driver Lewis Hamil­ton chuan, "Kan team-in bul kan ṭan ṭha a, hun duhawm tak kan hmang. Keimah bikah chuan bul ṭan dan kha tih tam ka mamawh a, harsatna ka nei tihna ni loin ka ṭan fuh tawk lo a ni," tiin an result-ah a lawm thu a sawi ve bawk.

Australian Grand Prix zawh hian Bahrain Grand Prix neih lehnghal ltur a ni a, March 31, Pathianniah tlan a ni ang.