French Open sawiseltu Pablo Cuevas
Uruguayan tennis player Pablo Cuevas chuan French Open thutlukna chu a sawisel a, midang dinhmun ngaichang lo leh ruahmanna siam hma lutukah a puh tel bawk.
Covid-19 vangin khawvel pumah infiamna a chawl ṭhup. May 24 aṭanga khelh tur French Open chu September thla tawpa khelh turin March thla khan thutlukna an siam fel der tawh.
Paris khawpuia inelna neih hun tur hian US Open khelh hun nek buai chiah lo mah se a inhnaihchilh a, hard court inelna ṭhenkhat chu a nek buai ngei dawn - player leh thuneitu lam tan inhnial theih tak a ni reng a ni.
Cuevas chuan, "Ka ngaihdan chuan Roland Garros hian thu an ti tlu hma lutuk, midang ruahmanna leh hmathlir pawh an ngaihtuah pui ve turah ka ngai. Tournament dang zai an ngai miah lo tihna a ni a, season calendar pawh a ti buai bawk.
"Wimbledon chu ṭhulh fel a ni tawh a, a pawi ka ti takzet. Clay court inelna lian French Open hi nei thei tur pawhin ka duhsak, chutihrualin calendar tibuai nasa lo zawnga tih dan awm thei se a duhawm hle," a ti.
Uruguay tlangval chuan mipa leh hmeichhe inelna lam sawi zuiin, "ATP leh WTA ten season kan hman chhunzawm theih ngei ka beisei. Chutihrualin inelna nei leh tur chuan zalen taka player kan chet vel theih hun nghah a ṭhat ka ring," tiin a sawi bawk.