Sunil Chhetri tan Padma Shri

Indian football team captain Sunil Chhetri chu India rama civil mi chawimawina sang palina Padma Shri pek a ni a, Inrinni khan India president Ram Nath Kovind chuan he chawimawina hi a hlan a ni.

Sunil Chhetri hi Indian footballer zinga he chawimawina dawng thei parukna a ni a, a hma hian Mohun Bagan legend Gostha Pal, English FA-in kum 1953-a '10 best Captains of the world'-a thlana lang phak Sailen Manna, kum 1962 Asian Games-a Indian football team-in gold medal an lak ṭuma captain Chuni Goswami, kum 2004-a FIFA Order of Merit dawngtu PK Banerjee leh Asian Football Hall of Fame-a lang phak Bhaichung Bhutia te chuan he chawimawina hi an lo dawng tawh.

Bengaluru forward Chhetri hian AFC Asian Cup 2019-ah khan India team hi kaihruaiin Nehru Cup (2007, 2009, 2012), AFC Challenge Cup (2012) leh SAFF Championships (2011, 2016)-ah te nomawi a lo chawipui tawh a, heng inelnaah te hian India tan player pawimawh a ni phak vek.

Kum 34 mi Chhetri hian ram tan match 107 inlanin goal 67 a khung a, ram tana inlan ngun ber niin Blue Tigers tana goal khung hnem ber a ni bawk. Ram tana la inlan mek footballer zingah Cristiano Ronaldo chu goal khung tam lama a tluk loh awmchhun a ni.

Indian cricketer chawl ta Gautam Gambhir chu he chawimawina hi hlan a ni bawk a, December 2018-a cricket chawlhsantu batsman hian kum 2011 khan India tan World Cup nomawi a chawi a, ram tan run 10,324 zet a vaw chhuak thei a ni.

Padma Shri dawngtu infiammi te
Bombayla Devi Laishram (Archery) Manipur
Prashanti Singh (Basketball) Uttar Pradesh
Gautam Gambhir (Cricket) Delhi
Sunil Chhetri(Football) Telangana
Ajay Thakur (Kabaddi) Himachal Pradesh
Sharath Kamal (Table Tennis) Tamil Nadu
Bajrang Punia (Wrestling) Haryana
Harika Dronavalli (Chess) Andhra Pradesh

Padma Bhushan
Bachendri Pal (Mountaineering) Uttarakhand