F1 season neih loh mai ni se - Ecclestone
Formula 1 chief executive hlui Bernie Ecclestone chuan tunlai boruak a thlir a, coronavirus vangin harsatna tam tak thleng zel theih a nih avangin F1 season chu hman loh mai ni se a ṭhat a rin thu a sawi.
Tun season intlansiak neih hmasak tur pariat chu a hun pangngaiah an nei thei dawn lo vek a, ṭhenkhat chu ṭhulh tawp pawh a awm tawh. Intlansiak dang 14 chu a hun pangngaia neih beisei an la ni, heng ho pawh hi an dinhmun a chiang chuang lo.
Car intlansiakna sang ber hi world championship nei tur chuan a tlem berah intlansiak pariat tal a awm a ngai, tuna thuneitu lam chuan intlansiak 15 vel bawr chu neih theih an la beisei.
Kum 89 mi Ecclestone chuan, "Kuminah inelna awm lo se, nakkum atana inbuatsaih mai chi a ni. Ka hmuh dan chuan intlansiak neih ngai zat kan neih theih ka ring lo, hun harsa dang kan insiam belh pawh a hlauhawm zawk.
"Intlansiak pariat chauh awm se, team leh driver champion chu an awm thei ngei mai. Mahse, miten eng angin nge an ngaihhlut a, an ngaih ropui ang tih chu zawhna lian tak a ni zawk," tiin a sawi.
Kuminah hian champion lai Lewis Hamilton chuan record ropui nih rual theihna hun a nei. Marcedes driver hi a champion leh a nih chuan record nei ṭha ber Michael Schumacher (7 title) a nihrual thei dawn.
Tunah erawh Britain tlangval hian hun ṭha a nei thei dawn em tih a chiang rih lo a, a elpui dang vawi li champion tawh Sebastian Vettel tan pawh Ferrari car khalh chunga ropui a tumna kawng hi a ṭhuanawp mekah a ngaih theih.