MotoGP-in team pawisa pe dawn
Bike intlansiakna sang ber MotoGP chuan hri leng vanga buaina tawk a hnuaia team-te chu sum a pe dawn. Pawisa hi MotoGP bakah Moto2 leh Moto3 huanga mite tan a ni.
March thlatira ṭan tum MotoGP season hi Covid-19 vangin an la tlan thei lo. Tunah chuan May 31-a tlan tur Italian Grand Prix chu an beisei hmasak a ni; Italy hi hri len nasatna hmun a nih avangin Mugello tlan kawngah hian an tlan theih a rinawm chuang lo.
Italy leh Spain hi rider awm tamna hmun a ni a, anni ram pahnih tel lo chuan a kal thei meuh lo. Champion lai Marc Marquez chu Spain tlangval a ni a, legend Valentino Rossi pawh Italian a ni.
MotoGP chuan thuchhuah siamin, "International Road-Racing Teams Association (IRTA) kaltlangin, MotoGP hnuaia team-te chuan April, May leh June thla chhung hian an sum hmuh tur ang chu an hmu ang.
"Inelna hi kan ṭan emaw, ṭan lo pawh ni ila pawisa an hmuh tur ang hi an hmu ang. He ruahmanna hi team tin an buai lutuk loh nan leh, an hnuaia hnathawkte hlawh an pek theih nana tih a ni," an ti.