Fulham khelmualah Reds a sen lar
Liverpool-in Premier League hmahruaitu ni turin Fulham chu Pathianni zan khan 2-1 in an hneh a, Manchester City aia match khata khel tam chungin table chung berah an awm.
Merseyside club tan Sadio Mane chuan goal hmahruai a khung a, Fulham hian Ryan Babel hmangin sut mah se James Milner chuan penalty hmangin chakna goal a khung a ni. Reds-in hnehna an chan avanga table chung ber an luah laiin Fulham erawh table-ah 19-na an ni mek a, match khelh tur pasarih chiah a awm tawh avangin season thara Champions League khel turin an dinhmun a chhe ta hle.
Liverpool fan-ten champion sawi rik laiin Chelsea fans buaina erawh season thara Champions League khelh leh khelh loh a nih chhunzawm zel a, an mikhualna ramah 0-2 in Everton an ngam lo. Chelsea-in hnehna an chan zawh loh avangin parukna dinhmun an luah mek a, khelh zat inangah table-a palina dinhmun luahtu Arsenal an phak lohna chu point thum a ni.
Hei le Mane
Liverpool-in Fulham lakah goal khung turin hun an mamawh rei lo. Sadio Mane chuan minute 26-na lekah goal hmahruai a khung a, Roberto Firmino siamsak a ni.
Mane hian a match hnuhnung 11-a goal 11 a khungna a ni a, tun season-ah inelna hrang hrangah match 38 khelin goal 20 a khung tawh a, Premier League bikah goal 17 a khung tawh bawk. Senegalese forward hian goal a khung piah lamah Babel-a'n minute 74-naa an si phurh a rawn sut hnuah penalty a hlawh chhuak a, James Milner chuan goal-ah a chantir - Mane vangin Reds an chak tia sawi ngam a ni.
Hetihlai hian Fulham tana goal khungtu Babel hi 2007-2011 inkara Reds tana khel tawh a ni a, a club hlui lama goal a khung hian a lawm duh lo.
Beisei phak lo
Liverpool-in hnehna an chang chungin an ṭhat dan berin an khel chhuak lo tih chu hmuh hmaih rual a ni lo a, Fulham an khelh ṭhat bik miau loh avangin an vannei, tia sawi theih a ni.
Roberto Firmino-a'n ṭum dang a phak lo tih a khelh danah a lang a, a ball chan lai an chhuhsak fo piah lamah ball pass sual a ngah em em bawk. Mohamed Salah-a'n beisei a phak lo chhunzawm zel a, Egyptian forward hian goal hmaah inrintawkna a hloh niin a lang - hun tawp hnaih lama Mane siamsak goal-a a chantir lo chu a ho takzet.
Liverpool boss Jurgen Klopp chuan, "Bul kan ṭan ṭha a, mahse a laihawl velah khan kan talbuai a ni. Manager tawnhriat ngah ber pawl ni kher lo mah ila Champions League khelh zawha harsatna hi a awm ve a ni," tiin Bayern Munich hneh hlim a naute an chauh thu a sawi.
Blues an mualpho
Season ṭantira champion sawi ri ngam Chelsea fan-ten Everton laka 'tlawm' kher hi chu an inring lo ang - mahse Pathianni zan khan an mikhualna ramah Liverpool khaw club hi 0-2 in an ngam lo. Blues hian first half-ah inkhel thunun mah se goal erawh an khung thei lo a, Eden Hazard chuan post pet perin Pedro chuan hnai set sawt aṭangin a pet goal lo bawk - second half-ah an tuar zui.
Richarlison chuan tun season-a a goal 13-na ni turin chawlhlawk zawh aṭanga minute lina lekah Everton goal hmahruai a khung a, Richarlison penalty hlawhchhuah chu Gylfi Sigurdsson chuan minute 72-naah pet goal lo zet mah se a per lehlam chu goal-ah a chantir leh tho.
Blues manager Maurizio Sarri chuan, "Tun season-a first half kan khelh ṭhat ber kan khel a, mahse mak takin second half-ah khan kan khel chhe ta thut a ni," tiin an chak loh chhan a sawi.