Indian Wells-ah Thiem-a'n Federer hnehin a champion

Dominic Thiem chuan Masters 1000 title hmasa ber la turin Pathianni khan Roger Federer chu 3-6, 6-3, 7-5 in a hneh.

California-a inelna neihah hian Federer-a'n set hmasa ber la mah se kum 25 mi Thiem hian huaisen takin a bei let a, a talbuai duh loh bawk avangin hnehna a chang.

British number one hlui Greg Rusedski chuan Austrian tennis star Dominic Thiem fakin, "Rafael Nadal, Federer, Novak Djokovic leh Andy Murray te an awm hi chuan nomawi chawi hi a harsa a, chuvangin Thiem-a hlawhtlinna hi a hlu bik a ni. Nakin hun thlengin a theihnghilh lo ang," tiin a sawi.

Swiss icon Federer hian Grand Slam title 20 a kawl mek a, amah hnahi bertu Rafael Nadal-a'n 17 a la ve tawh bawk. Kum 37 mi Federer hian Grand Slam hmabak French Open, Wimbledon leh US Open zinga pakhat tal a lak chuan Australian tennis player Ken Rosewall khumin Grand Slam champion thei upa ber a ni ang.