Indian football roreltu Bengaluru

Bengaluru FC-in Indian football thununtu an ni tih an pholang leh ta a, Pathianni zan khan Indian Super League final-ah FC Goa chu 1-0 a hnehin an champion.

Minute 90 chhung team pahnih hian goal an khung loh hnuah extra time khelh a ni a, minute 116-naah Rahul Bheke chuan he inkhela goal awmchhun hi a khung - Goa tan chhanletna hun a awm tawh lo. Kum 2013-a din Bengaluru-in ISL nomawi an chawi leh tak avangin Indian top flight football-a nomawi chawi theih zawng zawng chu an chawi kim ta a, nomawi chawi loin season an la khar ngai lo!

Bengaluru hian season hmasa khan Indian Super League-a an season hmasa ber hmangin final an lut a, mahse Chennaiyin FC ngam loin an champion zo lo - tun season-ah erawh dangtu nei loin nomawi an chawi ta.

Inkhel chu

Mumbai Football Arena-a inkhelah team pahnih chak tumin an innawr nghal a, minute rukna lekah Bengaluru striker chhuanvawr Miku chuan Goa defender rual bum mah se goalkeeper Naveen Kumar a paltlang thei lo.

Goa tan goal khung khawl Ferran Corominas chuan Jackichand Singh hnen aṭangin goal khungna remchang nei mah se a chhawr thei lo a, first half-ah goal lut loin team pahnih an inṭhen. FC Goa captain Mandar Rao Dessai chu first half tawp lamah hliam vangin lakchhuah a ni a, second half-ah Bengaluru goal nawr a na zawk - Miku chuan post a pet per a, goal erawh a nei thei bik lo.

Extra time khelh a ni a, Goa vanduai a kaltluang - hliam vanga an captain chântu team hian Ahmed Jahouh chu a yellow card pahnihna a hmuh avangin minute 105-naah an chan a, Rahul Bheke chuan minute 116-naah goal khung zuiin FC Bengaluru an chak.

Hello Asia!
Bengaluru captain Sunil Chhetri chuan, "Season hmasa final-ah kan tlawm a, mahse engtikah emaw chuan he nomawi hi chawi ngei kan lo inbeisei ṭhin. En teh Asia, kan lokir leh ta," a ti.

South Indian club hian kum 2016 khan AFC Cup-ah final an lo lut tawh a, 2017 khan inter-zone final (semifinal tlukpui) leh 2018 khan Inter-zone play-off semi-final (quarterfinal tlukpui) an lo khel tawh bawk. ISL nomawi an chawi theih nan Sunil Chhetri hian goal kua a khung a, season hmasa khan final an luh nan goal 14 khungin Hero of the League-ah thlan a lo ni tawh.

Chhetri chuan coach Carles Cuadrat fak zuiin, "Roca leh Carles danglamna chu Carles hnuaiah chuan league nomawi kan chawi hi a ni," a ti a, an champion-na kawngah tlarhnung an pawimawh thu a sawi tel bawk.

Fak tlak Bengaluru
Bengaluru-in Indian football-a ro an relna kawngah club inenkawlna chu fak phu a ni a, kum 2013-a din an nih hnuah season tinin nomawi an la chawi ziah.

Indian football-a an season hmasa ber 2013-14-ah I League nomawi an chawi nghal a, hetihlai hian Mizo player Beikhokhei Beingaichho, Lalrozama Fanai leh Thomas Lalengkima te chu Bangalore club tan hian an khel. Bengaluru hi 2014-15 season-ah erawh league-ah pahnihna an ni a, Federation Cup-ah champion thungin he season-ah hian Mizo player awm sa Beikhokhei bakah Lalthuammawia Ralte leh Lalchhuanmawia Fanai te chu an player pawimawh an ni.

Kum 2015-16 khan Bengaluru hi I League-ah an champion leh a, Beia, Chhuantea leh Thuama bakah Malsawmzuala leh Daniel Lalhlimpuia chu Mizo player an neih belh an ni a, Mizo player-te hian dinhmun pawimawh an luah phak vek.

Hei le Roca
Bengaluru hian 2013-16 chhunga hlawhtlinna an channa kawngah coach Ashley Westwood chu mi pawimawh a ni a, mahse 2016-a a contract a zawh rualin inremna an neih theih loh avangin an inṭhen.

Barcelona assistant coach hlui Albert Roca an lalut a, Roca enkawlna hnuaiah hian an season hmasa berah I League-ah palina an ni a, Federation Cup-ah erawh an champion - Thuama, Chhuantea, Daniel, Sawmtea, Beia leh Sena Ralte te chu Bangalore club tan hian an khel.

Roca hian season hmasaah pawh khan ISL final a hruai thleng a, nomawi erawh chawi loin Indian Super Cup-ah an champion thung - Daniel, Sawmtea, Thuama leh Zotea Ralte te an kawl. Tun season-ah Bengaluru hian Mizo rawlthar Sairuatkima leh Edmund Lalrindika te an kawl.

Eng nge an sawi?
Goa coach Sergio Lobera chuan, "Extra time khelh hnua Ahmed Jahouh hnawhchhuah a ni kha kan tuar a, ka ngaihdanah chuan game inhnehtawk tak a ni a, kan kim ta lo kha kan tuar a ni," a ti.

Lobera chuan, "Ka ngaihdanah chuan game ṭha tak kan khel a, ka player-te hnathawhah khan ka lawm takzet a ni," tiin a sawi. Bengaluru coach Carles Cuadrat chuan, "Goa hi team ṭha tak an ni a, an tlarhnung a phui em em bawk. Penalty pet a ngaih hmaa goal kan khung kha ka lawm takzet a ni.

"Ka player-te nen rim takin kan thawk a, an lak aṭangin ka beisei a tam em em a ni," tiin a player te a fak zui.