Covid-19 vangin Pep Guardiola nu Dolors Sala Carrio a thi

Manchester City manager Pep Guardiola nu Dolors Sala Carrio chu March 6, Thawhṭanni khan coronavirus vangin a thi a, kum 82 mi a ni.

City chairman Khaldoon Al Mubarak chuan, "Pep Guardiola leh a chhungte zawng zawng an chhiat tawhna avangin kan ṭawngṭaipui a, City chhungkua chuan hun harsa an tawh lai hian kan hre reng a ni," tiin club aiawhin thuchhuah a siam.

Covid-19 vangin Spain an buai a, nimin tlai thleng khan natna vei 140,510 awm tawhin anmahni aia vei tamna ram chu USA (367,650) chauh an awm. Spain-ah hian coronavirus vanga thi 13,798 an awm a, Italy (16,523) leh USA (10,943) inkarah awmin Covid-19 vanga tuar nasa ber zinga mi an ni.

March thla khan Guardiola-a'n Covid-19 do nan euro maktaduai khat (£920,000) a thawh tawh a, natna vei enkawltute inthuamna leina atan an hmang. Pep-a nu Dolors ala Carrio chenna Barcelona hi Catalonia chhunga awm niin Covid-19 vei tamna hmun a ni.

La Liga bakah club leh footballer ṭhahnem takin Guardiola an tawrhpui thu social media kaltlangin an ziak. Pep hi player a nih laiin player vantlang chunglam a ni a, manager a nih hnuah khawvel manager ropui ber zinga mi a ni.

Dolors Sala Carrio hi Barcelona, Bayern Munich leh Manchester City hlawhtling taka enkawltu Guardiola nu a nih miau avangin ngaihven a hlawh a, tawrhpuitu pawh an tam hle.