Covid-19 vangin Dempsey a thi
American football-a hming dai tawh ngai lo tur Tom Dempsey chu Covid-19 a kai hnuah kum 73 mi niin a thi a, a nupui Carlene bakah a tu leh fa engemaw zat a kalsan a ni.
New Orleans Saints legend hian National Football League-ah season 11 chhung hun a hmang a, team panga tan khelin Saints bakah hian Philadelphia Eagles, Los Angeles Rams, Houston Oilers leh Buffalo Bills tan a khel a, 1979 khan inkhelh a chawlhsan.
Dempsey hi kum 2012 aṭang khan Alzheimer leh dementia natna avangin a buai tawh a, March 25 khan Covid-19 a kai tih hriat a ni. Inrinni khan he hri leng hi hneh zo loin a thi a, American football tan chuan channa nasa tak a ni.
Tom Dempsey hian kum 1970 khan yard 63-a thui kick a nei a, hei hi kum 2013 hma kha chuan NFL-a field goal thui ber a ni ṭhin - a ke dinglam zung ṭang kim lo leh kut ding lam zung ṭang kim lo chungin a piang a, hetichung hian player ropui tak a ni thei.
Saints neitu Gayle Benson chuan, "Hun rei tak chu natna doin a hun a hmang a, mahse a dan pangngai angin lungngaiin a indawm kun mai lo a, fiamthu thawhin min ti hlimtu tak a ni fo reng a ni," tiin an club legend chu a thlah.