NECS Cup : Lengpui Vs Khatla; AVS Vs Chanmari West

NECS Cup last 16 chu vawiin hian khelh zawh a ni dawn a, chawhma dar 11:00-ah Aizawl khaw pawn team ṭha Lengpui leh Khatla an inkhel ang a, chawhnu dar 1:00-ah Armed Veng South leh Chanmari West an inkhel ang.

Lengpui-ah hian Lammual mawitu tiha sawi ṭhin Rohmingthanga'n a la ho thei a, a nau India aiawh pawha khel tawh Lalchhuanmawia (Chhuantea) an chhawr thei a, Aizawl FC tlarhmaa player pawimawh ni pha F. Lalremsanga an an kawl. Tun ṭum hi tun hnaia an kim kim ber ṭum a nih avangin champion rinkai zinga mi an ni a, an khingpui tur Khatla tan quarterfinal lut turin hmabak hau takzet paltlang a ṭul ang.

Chawhnu lamah Aizawl inkhelh thiam veng pahnih an inhmachhawn dawn a, Armed Veng South-in Lalrammuanpuia (Apuia) leh Lalnunsanga (Tale-a) te chu an hmachhuan tur a ni dawn. Chanmari West hian veteran striker H. Lalnunzira bakah Vanlalbiaa Chhangte te an kawl thung a, an intluk tawk viau tura ngaih a ni.

Nimin inkhel hmuhnawm takah Armed Vengin anmahni ang bawka team ṭha Bethlehm Vengthlang chu injury time-a Lalfakzuala goal hmangin an hneh hram. BVT defender handball vangin injury time-ah Armed Veng hian penalty an hmu a, Lalbiakhlua pet chu keeper-in dang mah se a per nang hmasa bertu Fakzuala'n chakna goal khung nan a hmang.

BVT an vanduai a, goal luh hma hian Lalrammawia chu box pawn chiahah Armed Veng defender Lalramchullova'n a titlu a, East Bengal defender hi hnawhchhuah a ni mah se an freekick hmuh an hmang ṭangkai lo a. Armed Veng-in player 10-a khel chungin an ṭang tluan.

Nimin inkhel dangah Chanmari tan Lalnunzama a vul a, Khelo India best player pawh lo ni tawh Zama hian Hlimen lamah hattrick siamin 3-1 in an chak.