England-in Hudson-Odoi an ko

Gareth Southgate chuan England tana inlan turin Chelsea rawlthar duhawm Callum Hudson-Odoi a ko a, kum 18 mi winger chuan a hriat tirhin fiamthu emaw a tih thu a sawi.

Odoi hi England Under 21 tana inlan tura kal a ni a, mahse senior team tan inlan tura koh a nih thu hrilh a ni zui. Odoi chuan, "Under-21 manager Aidy Boothroyd-a'n min hrilh khan a uang emaw ka ti a ni," a ti!

England hian Euro qualifier-ah March 22 zan khian Czech Republic an mikhual dawn a, March 25 zanah Montenegro an lenchilh leh bawk ang.

Hudson-Odoi chuan, "Ka tan chuan tawnhriat duhawm tak a ni a, he hmuna tel ve tura koh ka ni hi ka hlim takzet. Ka tan chuan mang ram thleng dik a ni a, hun ṭha ka neih phawt chuan ka theihna pholan ka tum ang," a ti.

Bayern Munich-in pound maktaduai 35-a lakluh an tum Hudson-Odoi hian tun season-ah Chelsea tan match 19 khel tawhin goal nga a khung. Mahse, match 11 hi bench aṭanga luhtir a ni a, hmun pawimawh a chan phak loh laia German club-in an duh bawk avangin chhuah a dil a, mahse Chelsea lam hian an remti lo.

England squad-ah hliam vangin Luke Shaw, John Stones, Fabian Delph leh Ruben Loftus-Cheek te an inhnukdawk tawh a, Odoi ang bawk hian Southampton midfielder James Ward-Prowse chu ram tana inlan turin a vawi khat nan koh a ni bawk.